Սեպտեմբերի 9-ին Ուկրաինայում Իրանի Իսլամական Հանրապետության գործերի ժամանակավոր հավատարմատար Շահրիյար Ամուզեգարը կանչվել է Ուկրաինայի արտաքին գործերի նախարարություն, որին հայտնել են ուկրաինական կողմի խորը մտահոգությունը Իրանի կողմից Ռուսաստանի Դաշնությանը բալիստիկ հրթիռներ ուղարկելու առնչությամբ։
Ուկրաինայի Արտաքին գործերի նախարարության մեկնաբանության մեջ նշվում է, որ իրանցի դիվանագետին ուղղված «կոշտ նախազգուշացում է հնչել, որ Իրանի կողմից ագրեսոր պետությանը բալիստիկ զենք մատակարարելու փաստի հաստատումը կործանարար և անուղղելի հետեւանքներ կունենա ուկրաինա-իրանական երկկողմ հարաբերությունների վրա»։
The Wall Street Journal-ի փոխանցմամբ՝ Իրանը Ռուսաստանին է փոխանցել փոքր հեռահարության բալիստիկ հրթիռներ, սակայն փոխանցման ստույգ թիվն ու ամսաթիվը հայտնի չեն։ Պատերազմի ուսումնասիրման ինստիտուտի տվյալներով՝ Իրանը համաձայնել է փոխանակմանը՝ նկատի ունենալով Սու-35 կործանիչները։
Սեպտեմբերի 7-ին Ուկրաինայի ԱԳՆ-ն խորը մտահոգություն է հայտնել Իրանի կողմից Ռուսաստան բալիստիկ հրթիռների հնարավոր փոխանցման կապակցությամբ։ Ուկրաինան Իրանին կոչ է արել զերծ մնալ ցանկացած տեսակի զենք և ռազմական տեխնիկա Ռուսաստանին փոխանցելուց և զգուշացրել է երկկողմ հարաբերությունների համար հնարավոր կործանարար հետևանքների մասին։
