Իսրայելը հարվածել է Իրանին

Իսրայելական հրթիռները հարվածել են Իրանում գտնվող օբյեկտին, հաղորդում են ABC News, NPR և CBS-ը՝ վկայակոչելով ԱՄՆ պաշտոնյաներին հինգշաբթի՝ ապրիլի 18-ի ուշ երեկոյան:

Իրանական Fars պետական ​​գործակալությունը հայտնել է Իրանի Սպահան քաղաքի օդանավակայանում պայթյունի մասին՝ չճշտելով հանգամանքները։ Բացի միջազգային օդանավակայանից, Սպահանում տեղակայված է նաև Իրանի ռազմաօդային ուժերի բազան և իրանական միջուկային ծրագրին առնչվող մի շարք օբյեկտներ: Իրանական լրատվամիջոցները հաղորդել են երկրի մի շարք քաղաքների, այդ թվում՝ մայրաքաղաք Թեհրանի վրայով թռիչքների չեղարկման և օդային տարածքի փակման մասին:

Շաբաթ ապրիլի 13-ին Իրանը հարյուրավոր անօդաչու սարքերով և հրթիռներով հարձակվել է Իսրայելի վրա։ Անօդաչու թռչող սարքերի և հրթիռների մեծ մասը խոցվել է իսրայելական ուժերի և նրանց արևմտյան դաշնակիցների կողմից՝ նախքան երկիր հասնելը: Իրանը հարվածը հասցրեց Սիրիայում Իրանի դեսպանատան համալիրի վրա հարձակումից հետո, որի համար Թեհրանը մեղադրեց Իսրայելին: Իսրայելն իր հերթին խոստացել է պատասխան միջոցներ ձեռնարկել Իրանի հարձակումից հետո։