Մեր ժողովուրդը ոչ մեկից չպետք է վախենա, և այս ընտրությունները մեր պետության ճակատագրի մասին են։ Քաղաքացին ամենազորն է, քվեախցում ամբողջ իշխանությունը նրա ձեռքում է, և քաղաքացիների վախեցնողները գողանում են նրանց քվեները, լրագրողների հետ ճեպազրույցում այսօր ասաց «Միասնության թևեր» կուսակցության առաջնորդ Արման Թաթոյանը։
«Դրա համար մենք պետք է ոչ թե վախերով ընտրենք, այլ հանուն հույսի և հավատի, հանուն մեր երկրի ապագայի, և ինքներս որոշենք մեր ճակատագիրը։
Հարցումները, իմ շփումները քաղաքացիների հետ ցույց են տալիս, որ մեր շանսերը բարձր են, մենք հաղթահարում ենք շեմը, և մնում է ամենկարևորը՝ հնարավորին շատ վստահություն ստանալ»,- ասաց Արման Թաթոյանը՝ անարժանահավատ և «նիկոլական» որակելով ամերիկյան ընկերություններից մեկի հարցումների տվյալները, համաձայն որոնց իրենք բավական քիչ քվեներ են ստանալու։
Անդրադառնալով «Ուժեղ Հայաստան» կուսակցության նախագահ Սամվել Կարապետյանի՝ օրեր առաջ արած այն հայտարարությանը, որ ««Գելափ»-ի համար ամենակարևորը Թաթոյանին անցկացնելն է», Արման Թաթոյանն ասաց.
«Ինձ համար զարմանալի էր՝ Սամվել Կարապետյանն ինչու է այդպիսի հայտարարություն անում. չէ՞ որ այդ հայտարարությունը վնասում է քաղաքական ուժին։ Այսինքն՝ նա չի՞ ուզում, որ մեր քաղաքական ուժն անցնի պառլամենտ»,- լրագրողների հետ զրույցում հարց հնչեցրեց «Միասնության թևեր» կուսակցության վարչապետի թեկնածու Արման Թաթոյանը։
Նա նշեց, որ իր ցանկությունն է՝ բոլոր իրական ընդդիմադիրները, որքան շատ անցնեն խորհրդարան, որքան շատ ձայներ հավաքեն, այնքան լավ է, դա մեր պետության համար է։
«Ինձ համար անընդունելի էր հայտարարության ձևը, տոնը, որովհետև մենք որևէ մեկին չենք վիրավորում, պահում ենք արժանապատվությունը»,- ասաց Թաթոյանը։
