Ունենք անցած տարվա չափ զբոսաշրջիկ, սակայն մոտավորապես 2-3 հազարով ավելի պակաս։ 2024-ին ունեցել ենք մոտավորապես 2 մլն 215 հազար զբոսաշրջիկ։ Սա մոտավորապես 7 տոկոս անցած տարվա ցուցանիշից նվազում է, բայց փաստացի նվազել են միայն ՌԴ-ից զբոսաշրջիկները, այսօր կայացած տարեկան ամփոփիչ ասուլիսի ժամանակ հայտարարեց Էկոնոմիկայի նախարար Գևորգ Պապոյանը։
Ըստ նախարարի՝ ավելացել է Հնդկաստանից, ԱՄԷ-ից, Ֆրանսիայից, Վրաստանից, Իրանից Հարավային Կորեայից, Չինաստանից զբոսաշրջիկների թիվը։
«Մեր թիրախը 2026 թվականին՝ ունենալ 2,5 մլն զբոսաշրջիկ։ Սա այն է, ինչ պետք է ունենաք։ Ի՞նչ ենք անում այս ուղղությամբ. ոչ միայն զբոսաշրջային կլաստերներ ենք զարգացնում և պատմամշակութային մեր օբյեկտները բարեկարգում, այլև ունենք նաև 500-ից ավելի հոդվածներ միջազգային պարբերականներում, 90-ից ավելի ԶԼՄ-ների ներկայացուցիչներ, բլոգերներ եկել են Հայաստան, գրել, բլոգներ վարել Հայաստանի մասին, մասնակցել ենք միջազգային 4 զբոսաշրջային շոուների, 12 փառատոն ենք կազմակերպել և այլն»,- ներկայացրեց նախարարը։
