Ես հուսով եմ, որ մենք, ինչ-որ պայմանավորվել ենք մինչև ընտրությունները հեռուստադիտողների աչքի առջև, կկատարենք. ընտրություններից հետո լրագրողների հետ զրույցում ասաց Գյումրու քաղաքապետի թեկնածու Վարդան Ղուկասյանը, ով ընտրություններում ստացել է շուրջ 21 տոկոս ձայն:
Նա նշեց, որ խնդիրները լուծվելուց հետո միայն կարող է ասել, որ քաղաքապետ կդառնա, որովհետև թեկնածուներից մեկն իր խոսքը չի ասել՝ նկատի ունենալով «Իմ քաղաքը» դաշինքի թեկնածու Մարտուն Գրիգորյանին։
«Ես, օրինակ, էսպես եմ ասել, եթե ընդդիմությունից որևէ մեկն ինձնից շատ ձայն հավաքի, ես, միանշանակ, կմիանամ իրեն՝ առանց պաշտոնի ակնկալիքի։ Գիտեմ, որ Ռուբենը հայտարարություն է արել, Կարենը՝ նույնպես, նրանցից շնորհակալություն եմ հայտնում։ Հուսով եմ, որ իրենց հետ կբանակցեմ, կքննարկեմ»,-ասաց նա։
«Ինչ վերաբերում է Մարտուն Գրիգորյանին՝ հուսով եմ, որ ինչ ասել է՝ կանի, ինչ էլ պակաս է եղել, կարող ենք բանակցել, նստել խոսել։ Ես ոչ մեկին թշնամու աչքերով չեմ նայում, ինչքան էլ վերադաս կառույցը կարողացավ խառնել, ես ասել եմ՝ հայ ժողովրդի մեջ ես թշնամի չունեմ։ Ես ներողամիտ մարդ եմ»,-ասաց նա։
Իսկ թե որևէ խոսակցություն դեռևս չի՞ եղել Մարտուն Գրիգորյանի հետ՝ ասաց, որ ոչ։
Հարցին, թե չմիանալու դեքպում ինչ կանի՝ պատասխանեց. «Ես պետք է դեռ համոզվեմ, որ Մարտուն Գրիգորյանը չի միանա ընդդիմությանը, նախ պետք է դրանում համոզվեմ։ Դրանից հետո մենք հայտարարություն կանենք՝ ով է նպաստում ՔՊ-ին։ Ինձ մի հարցրեք, թե չմիանա, դրանից հետո ինչ է լինելու։ Բայց ես իր խոսքը լսել եմ, որ անպայման միանալու է, մեր քաղաքում ՔՊ-ն չի անցնելու»։
Իսկ թե հանուն Գյումրու, եթե նման վիճակ լինի, կգնա՞ զիջումների՝ ասաց, որ պատրաստ չէ այդ հարիցն պատասխանել, մինչև չհամոզվի՝ ինչ է կատարվում․ «Երբ լինի այդպիսի իրավիճակ, կտեսնենք՝ ինչ կանեմ»։
«Իմ 13 տարի աշխատած ժամանակահատվածում, եթե նայեք, Մարտուն Գրիգորյանի բոլոր ունեցվածքների տակ գրված է Վարդան Ղուկասյան: Ինչ սեփականություն իրենք ունեն, եւ ոչ միայն իրենք, իր հորեղբայրները, իր թաղի ժողովուրդը եւ մնացածը… Նվեր չեմ արել, մարդիկ ուզեցել են քաղաքում ներդրում անել, ես չեմ նայել, թե սա ընդդիմություն է ինձ, թե ոչ, ես բոլորին արել եմ: Ինչ կա էս քաղաքում բոլորն իմ տվածն է, եւ տակը գրված է շինթույլտվություն՝ Վարդան Ղուկասյան, ավարտական ակտ՝ Վարդան Ղուկասյան: Այսինքն կարող է նույնիսկ որեւէ մեկի հորեղբայրը լիներ քաղաքապետ։ Ւնձ պես ավելի առատաձեռն չլիներ, ոնց որ ես եմ եղել բոլորի նկատմամբ, ոչ միայն Մարտունենց նկատմամբ»,- ասում է Վարդան Ղուկասյանը:
Վարդան Ղուկասյանն ընդգծում է. «Ես ներողամիտ եմ, հանուն ազգի ամեն ինչի պատրաստ եմ, սպասեք, հասկանաք»:
Նշենք, որ Գյումրիում նախնական արդյունքներով ավագանի են անցնում 5 ուժեր: ՔՊ-ն կստանա 14 մանդատ, Վարդան Ղուկասյանը՝ 8 մանդատ, Մարտուն Գրիգորյանը՝ 6 մանդատ, Ռուբեն Մխիթարյանը՝ 3 ամնդատ եւ «Մայր Հայաստանը»՝ 2 մանդատ:
