Թուրքագետ Ռուբեն Սաֆրաստյանը ՀՀ իշխանությունների վարած քաղաքականության մեջ Հայոց ցեղասպանության ուրացում չի տեսնում։
«Օրինակ՝ ուրացումն ինչո՞ւմ է երևում։ Ուրացում չկա։ Ի՞նչ ուրացում, որտե՞ղ եք տեսել, որ ուրացել են»,- Azg.am-ի թղթակցի հետ զրույցում ասաց թուրքագետը։
Հարցին՝ արդյոք ուրացում չէ այն, որ վարչապետ Նիկոլ Փաշինյանն ամիսներ առաջ շվեյցարահայ համայնքի մի խումբ ներկայացուցիչների հետ հանդիպման ժամանակ հայտարարել էր՝ «Պետք է հասկանանք, լավ՝ ինչ է տեղի ունեցել և ինչու է տեղի ունեցել, և ինչպես ենք մենք դա ընկալել, ում միջոցով ենք ընկալել», կամ արդյոք ուրացում չէ ԱԳ նախարար Արարատ Միրզոյանի հայտարարությունը, որ «Հայոց ցեղասպանության միջազգային ճանաչման գործընթացը մեր թիվ մեկ առաջնահերթությունը չէ», Ռուբեն Սաֆրաստյանը պատասխանեց.
«Բայց դա ուրացում չի, որովհետև Ցեղասպանության ճանաչման քաղաքականությունը դա քաղաքականություն է, իսկ քաղաքականությունն իրականության հետ է առնչվում։ Իսկ իրականությունն այն է, որ հիմա Հայաստանն այն վիճակում չէ, ինչ մինչև արցախյան վերջին պատերազմը։ Եթե պարտությունից հետո Հայաստանը հիմա այս վիճակում է հայտնվել, պետք է վերականգնի իր Զինված ուժերը, զենքերով համալրի, վերականգնի իր հեղինակությունը։
Այսինքն՝ հիմա ինքը չի կարող այդ քաղաքականությունն իրականացնել, բայց դա պետք է պահել։ Ես Հայաստանի մասին եմ խոսում, իշխանությունները կարևոր չեն։ Հայաստանը Հայաստան է. իշխանություններն այսօր կգան ու վաղը կգնան, ուրիշները կգան։ Հիմա մեր երկիրը լուծում է գոյաբանական խնդիր»։
Դիտարկմանը, որ արտաքին քաղաքականությունն, այնուամենայնիվ, իրականացնում են ՀՀ գործող իշխանությունները, և Ցեղասպանության ժխտողականությունը նրանց վարած քաղաքականության մի մասն է, մեր զրուցակիցն արձագանքեց՝ Հայոց ցեղասպանության ճանաչման և դատապարտման քաղաքականությունը պետք է լինի մեր զինանոցում, բայց այդ քաղաքականությունը կարելի է տարբեր ինտենսիվությամբ իրականացնել։
«Հիմա այնպիսի ինտենսիվությամբ, ինչպես առաջ էինք անում, իմաստ չունի, որովհետև մեզ չեն էլ հասկանա. կասեն՝ էս երկիրը հիմա այսպիսի վիճակում է և փոխանակ իր գոյաբանական խնդիրները լուծի, այսպիսի հարցեր է առաջ տանում, հասկանո՞ւմ եք։ Մենք պետք է շատ լուրջ վերաբերվենք մեր երկրի հեղինակությանը։
Այսօր իշխանությունը գնացել, իր հարգանքի տուրքն է մատուցել Ծիծեռնակաբերդում։ Ցեղասպանության բնագավառում մեր հետազոտությունները շարունակվում են, իմ գիրքը վերջերս է լույս տեսել։ Կարող է քաղաքական նկատառումներից ելնելով՝ այդպիսի հայտարարություններ արվում են, բայց ուրացում ես չեմ տեսել։ Այլ բան է, որ եթե ես լինեի՝ չէի հայտարարի, որ Հայոց ցեղասպանության միջազգային ճանաչման գործընթացը մեր թիվ մեկ առաջնահերթությունը չէ։ Այդպես ավելի ճիշտ կլիներ»,- ամփոփեց Սաֆրաստյանը։
