Այս իշխանությունները եկել են՝ ՀՀ կործանման ծրագիր իրականացնելու. վերջին շրջանում Ցեղասպանության ուրացումն առավել ահագնացող տեմպերով է առաջ գնում. Տիրան Լոքմագյոզյան

Բնական է, որ ՀՀ գործող իշխանությունները պետք է աստիճանաբար, քայլ առ քայլ բացահայտեին Ցեղասպանության ժխտողականության իրենց քաղաքականությունը, սակայն վերջին շրջանում ուրացումն առավել ահագնացող տեմպերով է առաջ գնում,  Azg.am-ի թղթակցի հետ զրույցում փաստեց թուրքագետ Տիրան Լոքմագյոզյանը։

Մեր զրուցակիցը համոզմունք հայտնեց՝ ՀՀ գործող իշխանությունները եկել են՝ Հայաստանի Հանրապետության կործանման ծրագիր իրականացնելու համար, ինչն էլ հաջողությամբ անում են։

«Ես սա հենց այնպես, օդից վերցրած բաներ չեմ խոսում։ Ակնհայտ է, որ ՀՀ գործող իշխանությունների ամբողջ գործունեությունը, աշխատաոճը դա է ցույց տալիս։

Շատերը, ինչպես և ես, կարծում էինք, որ իրենք Արցախը ծախելու են, և հարցը դրանով փակվելու է։ Մենք կարծում էինք, որ խնդիրն Արցախն է, սակայն հետագայում նրանց աշխատանքը և Արցախից հետո իրենց գործունեությունը հարյուր տոկոսով ցույց տվեցին, որ այս իշխանությունների իրական նպատակը Հայաստանի Հանարապետության կործանումն է։

Ընդ որում՝ կործանում ամեն տեսակետով։ Իհարկե, այնպես չէ, որ Հայաստանի Հանրապետություն չի մնալու։ Իհարկե, պետություն մնալու է, սակայն Հայաստանի պետականությունը չի լինելու։ Հայաստանն ու հայ ժողովուրդն այսպիսով չեն լինելու»,- ասաց Տիրան Լոքմագյոզյանը։

Որպես իր խոսքերի ապացույց՝ թուրքագետն ընդգծեց՝ ՀՀ այսօրվա իշխանությունները կանխամտածված կերպով աշխատում են ժողովրդի հետ, ամեն ինչ անում կրթության որակը խաթարելու, տնտեսական վիճակը վատթարացնելու ուղղությամբ։

«Տեսեք, թե որքան են ավելացել ՀՀ պարտքերը՝ թե՛ ներքին, թե՛ արտաքին։ Սա ցույց է տալիս, որ իրենք ամեն ինչ անում են Հայաստանի Հանրապետությունը կործանման եզրին հասցնելու համար։ Կրկնում եմ՝ մի փոքր Հայաստան կմնա, պետություն կլինի, սակայն պետականություն չի լինի։ Ժողովրդին այսօր փոխում են կրթության, մշակույթի օգնությամբ.  հարց  է առաջանում՝ վաղը մեր երխաներն ի՞նչ գիտելիքներ և հետաքրքրությունների ոլորտներ են ունենալու։ Այսինքն՝ լինելու է հայ ժողովուրդ, սակայն միայն անունով։ Բուն իմաստով դա հայ ժողովուրդ չի լինելու»,- ասաց մեր զրուցակիցը։

Ըստ Տիրան Լոքմագյոզյանի՝ ստեղծված իրավիճակում ամենամեծ պատասխանատվությունն ընկնում է հայաստանյան էլիտայի վրա։

«Այո՛, շատ փոքր, բայց դեռ էլիտա ունենք։ Այդ էլիտան պետք է միահամուռ պայքարի, միասնական լինի, բայց նման բան չենք տեսնում։ Եթե մեր երկիրը և հայ ժողովուրդը կործանվեն, այդ ժամանակ դրա համար պատասխանատու է լինելու նաև էլիտան։ Այսինքն՝ այս ամենի պատասխանատվությունը չի ընկնելու միայն իշխանության ուսերին, լինելու է նաև էլիտայի ուսերին»,- ամփոփեց թուրքագետը։