Դիմում եմ աշխարհասփյուռ հայությանը՝ համախմբվել հայկական Արցախին զորավիգ լինելու գաղափարի շուրջ․ Արցախի ԱԺ պատգամավոր

21

Այն, ինչ մենք տեսնում ու լսում ենք վերջին ամիսների ընթացքում, հետևանք է նրա, որ ՀՀ ԱԺ-ում ներկայացված պատգամավորների մի ստվար մասը ճիշտ պատկերացումներ չունի այսօրվա Արցախի և նրա շուրջ կառուցվող անվտանգային միջավայրի, մեր այսօրվա մարտահրավերների մասին։ Այսօր Արցախի ԱԺ արտահերթ նիստի ժամանակ հայտարարեց «ԱԺԿ» խմբակցության պատգամավոր Դավիթ Մելքումյանը։

Արցախի ԱԺ պատգամավորն ուշադրություն հրավիրելով այն փաստի վրա, որ մեկ տարվա ընթացքում չի հաջողվել երկու հայկական հանրապետություններին միջխորհրդարանական հանձնաժողովի որևէ նիստ գումարել, նշեց, որ այդ երևույթին ուրիշ որակում պետք է տալ։

«Մեր պայքարը երբեք տարածքների համար չի եղել։ Ազատագրական պայքարի դրոշի տակ համախմբվելու արդյունքում մենք վաստակեցինք հայրենիք ունենալու իրավունքը։ Այդ ճանապարհի ունեցանք հազարավոր կորուստներ՝ Արցախից, մայր Հայաստանից ու Սփյուռքից։ Պետք չէ մեզ վախեցնել նոր պատերազմով, որովհետև մենք ամենաշատն ենք շահագրգռված խաղաղություն հաստատելու հարցում, բայց դա չի կարող լինել մեր անցած երեսուն տարվա պատմությունը ջնջելու ճանապարհով»,-ասաց Մելքումյանը։

Շեշտելով ստեղծված իրավիճակում նոր ազգային առաջնորդություն ունենալու անհրաժեշտությունը, որը կկարողանա ապահովել ազգային միասնությունը՝ Արցախի ԱԺ պատգամավորը դիմեց աշխարհասփյուռ հայությանը՝ համախմբել հայկական Արցախին զորավիգ լինելու գաղափարի շուրջ։

Աղբյուր` Փաստինֆո