Մեր վարչական բյուջեի 5 տոկոսի չափով ամեն տարի հատկացում ենք անում սոցիալապես անապահով ընտանիքների համար։ Լրագրողների հետ զրույցի ժամանակ այս մասին ասաց Գորիսի քաղաքապետ Առուշ Առուշանյանը։
Նրա խոսքով ներկայիս իշխանությունները ստուգել են 2017թ.-ի նոյեմբերի 5-ից հետո իր կատարած ամբողջ աշխատանքը և որևիցե խախտում չեն գտել ու փորձել են որպես խախտում ներկայացնել այն, ինչ օրինական կերպով են իրականացնում։
«Մեզ մոտ այսօր էլ, ամեն օր էլ ընդունում ենք քաղաքացիներին։ Եթե քաղաքացին դիմում է քեզ և ունի վիրահատության խնդիր, չես կարող նրան ասել, որ պետք է մեկ ամիս սպասես։ Չկա մի մարդ, որ ինձ դիմի մի հարցով և այդ հարցին լուծում չտամ։ Ինչպե՞ս կարող ենք սոցիալապես անապահով մարդուն գումար տալ ու ասել, որ գնա մեզ քվեարկի։ Դա ամոթ է, դեմ է իմ սկզբունքներին և երբեք նման էժան բանի մեջ չեմ մտնի։ Մենք մոտ 507 աշխատող ունենք, և ես երբևէ նրանց չեմ ուղղորդել, որ ինձ ընտրեն»,-ասաց Առուշ Առուշանյանը։
Դիտարկմանը, որ այն քաղաքացիները, որոնք Քարահունջի համայնքապետ Լուսինե Ավետյանի դեմ ցուցմունք են տվել, ենթարկվել են որոշակի ճնշումների հեղափոխության պահապանների, թաղային հեղինակությունների կողմից, Առուշ Առուշանյանն ասաց. «Նրանք ո՛չ թաղային հեղինակություն եղել են, ո՛չ էլ կարող են լինել։ Նրանք ուղղակի բանսարկուներ են, որոնք իրենց նեղ անձնական շահի համար փորձում են մարդկանց ճնշել, բայց այս ամեն ինչի մեջ աբսուրդն այն է, որ քաղաքացին, որը որևիցե պետական սուբյեկտի և ծառայության հետ կապ չունի, գնում ու քաղաքացուն հորդորում է, որ գնա ցուցմունք գրի, հակառակ դեպքում իրեն կկալանավորեն»,-նշեց Գորիսի քաղաքապետը։
Հարցին՝ հավանական համարու՞մ է, որ այլ համայնքապետերի նկատմամբ նույնպես կարող են նման գործեր հարուցվել, Առուշ Առուշանյանն ասաց, որ Սյունիքի բոլոր վարչական ղեկավարներին էլ կանչում են. «Տեղեկություն ունեմ, որ երեկ Որոտան գյուղի ողջ ազգաբնակչությանը տարել են ոստիկանություն այդ նույն խնդրով»։
Անդրադառնալով Սյունիքում տիրող իրավիճակին՝ Գորիսի քաղաքապետը նշեց, որ թշնամին շարունակում է մնալ մեր սուվերեն տարածքում։
Վերջինս հստակ տեղեկություն չունի, թե քանի ադրբեջանցի կա մեր տարածքում։
Աղբյուր` Փաստինֆո
