«Ես չեմ դադարում զարմանալ շատ հայերի ֆանտաստիկ ինֆանտիլիզմի և միամտության վրա։ Հայաստանի բնակիչները բացարձակապես չեն հասկանում, թե ինչ է Ադրբեջանը և ովքեր են ադրբեջանցիները և ինչ է Ալիևի ռեժիմը». Facebook-ի իր էջում գրել է հայտնի բլոգեր Ալեքսանդր Լապշինը ՝ անդրադառնալով որոշ «հայերի» տարօրինակ ցնծությանը Արցախի ղեկավարների բանտային լուսանկարների առնչությամբ, որոնք տարածվել են ադրբեջանական լրատվամիջոցների կողմից:
Կրկին կիսվելով ադրբեջանական բանտում գտնվելու իր դառը փորձով ՝ հայտնի բլոգերը ամոթանք է տվել նման «հայերին» ՝ գրելով. «Այդպիսի հայերը ինձ մոտ ուղղակի սրտխառնոց են առաջացնում»։
«Վերջին օրերին ադրբեջանցիները տարածել են «երջանիկ» հայ գերիների լուսանկարները, այդ թվում ՝ Արայիկ Հարությունյանի, Դավիթ Բաբայանի և այլոց, ովքեր իբր գրադարանում գրքեր են կարդում, հեռուստացույց դիտում և նույնիսկ խցում ջեռուցման մարտկոցներ կան։ «Նրանց մոտ ամեն ինչ լավ է, նրանք ամեն ինչից գոհ են, նրանք հանգստավայրում են»։ Եվ այդ ապուշ մեկնաբանությունները տասնյակ այլ միամիտ հիմարների կողմից հավանության են արժանանում։
Ժողովուրդ, դուք չեք հասկանում, որ դրանք բեմադրված լուսանկարներ են։ Ինձ Բաքվի բանտում պահում էին և տանում գրադարան՝ ալիևյան ԶԼՄ-ների համար լուսանկարվելու։ Ադրբեջանցիներն ինձ գիրք էին տվել։ Ասացին, որ ժպտամ, թե չէ կզրկեն բանտի բակում զբոսանքից։ Հետո ինձնից գիրքը վերցրին ու վերադարձրին կեղտոտ ու գարշահոտ խուց, որտեղ էլ պահում էին յոթ ամիս։
Բանտախցերն իրականում շատ ավելի վատն են, նրանց տարել են բժշկական մասնաշենք ՝ ֆոտոսեսիայի համար։ Այնտեղ բժշկական շենքում կան մի քանի էլիտար բանտախցեր, որոնք հենց այնպւսի տեսք ունեն, ինչպես այս լուսանկարներում: Սովորական խցերում ջեռուցում չկա, դատապարտյալները ձմռանը սառչում են, քնում են դեռ խորհրդային պատառոտված վերմակների տակ ՝ հագնելով իրենց եղած բոլոր հագուստը։ Այնտեղ հեռուստացույց չկա, բայց ինձ էլ լուսանկարի համար տարել են բժշկական մասնաշենքի խուց, որտեղ հեռուստացույց կար։
Երբ կարդում եմ այն հիմարությունները, որ հայերը գրում են Արցախի առաջնորդների «երջանիկ» դեմքերի մասին, այդպիսի հայերը ինձ մոտ ուղղակի սրտխառնոց են առաջացնում։ Անկախ լուսանկարում պատկերված մարդկանց անհատականությունից, նրանք իսկապես փորձանքի մեջ են ընկել և օգտագործվում են որպես Հայաստանի վրա ճնշում գործադրելու գործիք։ Դուք պետք է հասկանաք, որ Ադրբեջանն այսօր ոչնչով չի տարբերվում Թալիբանից կամ ԻԼԻՊ-ից։ Այդ գերիներին ամենայն լրջությամբ սպառնում են խոշտանգումներ ու մահ Բաքվի բանտում։
Ես ձեզ հիշեցնեմ, որ ինձ այդ նույն բանտում ադրբեջանցիները «Ալլահ Աքբար» գոռալով դաժանորեն ծեծեցին, կոտրեցին ձեռքս, մատներս, երեք կողերս, ծնոտս և ջարդեցին առջևի ատամներս։ Դա տեղի ունեցավ երեք ամիս անց այն բանից հետո, երբ նրանք նկարեցին ինձ «երջանիկ» ՝ գիրքը ձեռքիս: Եվրոպական դատարանն իր 20.05.2021 թվականի որոշմամբ Ադրբեջանին մեղավոր է ճանաչել ապօրինի ձերբակալման, դաժան խոշտանգումների և սպանության փորձի մեջ», – գրել է բլոգերը։
