Երևանի քաղաքապետ Տիգրան Ավինյանը, արձագանքելով մայրաքաղաքում առատ տեղումներին պատրաստ լինելու մասին.
«Ձյան տեղումների մասին խոսել ենք բազմիցս․ խցանումների երևի 80 տոկոսը պայմանավորված էին ամառային անվադողերով ավտոմեքենաներով ԱՊՊԱ-ների հետևանքով․ ԱՊՊԱ-ներն առաջանում էին հիմնականում ամառային անվադողերով դուրս եկած ավտոմեքենաների մոտ, չնայած այլևս տեղ չէր մնացել, որտեղով որ հայտարարություն չէր տարածվել, որ Երևանում առատ տեղումներ են սպասվում, մյուս խնդիրը ԱՊՊԱ համակարգի տրամաբանությունն է, որ՝ եկեք իրար թեթև քսելու պատճառով ժամերով սպասենք և ստեղծենք կիլոմետրանոց հերթեր։ Մարդիկ մեղավոր չեն։ Այո, գուցե մեղավոր են, որ ամառային անվադողերով են դուրս եկել փողոց, այդ հանգամանքը եթե հաշվի առնվի, հարց պետք է առաջանա՝ արդյոք պետք է փոխհատուցվեն մեքենաները, թե ոչ, բայց այդ համակարգը Երևանի համար աղետ է․ իրար թեթև քսված ավտոմեքենաները ժամերով երթևեկությունը կանգնեցնում են»,- ասաց նա։
Ավինյանի խոսքով՝ դա խնդիր է ստեղծել նաև քաղաքապետարանի տեխնիկայի համար, որն այդ կարևոր ժամերին պետք է հասներ համապատասխան վայրեր՝ աղ ու ավազ ցանելու։ Քաղաքապետը տեղեկացրեց, որ տեղումների հաջորդ օրը կենտրոնական բոլոր փողոցները մաքրված էին։
«Այնուամենայնիվ, անկախ նրանից՝ համատիրությունների հետ ինչ գործընթաց է տեղի ունեցել, նախ պետք է հականալ՝ եթե աղ ու ավազ տրամադրել ենք, ինչ են արել․ բակերը որ տեսնում ենք, այդ տպավորությունը չի թողնում»,- ասաց նա։
Քաղաքապետը վարչական շրջանների ղեկավարներին հորդորեց հանդիպել համատիրությունների ղեկավարներին․ եթե հավելյալ ռեսուրսի խնդիր կա․ աղը պետք է տրամադրել։
«Աշխատանքները պետք է ուղղենք մայթերի և բակերի մաքրմանը։ Այս գիշեր մինուս 17 աստիճան է սպասվում, կարևոր է, որ այդ աշխատանքները իրականացվեն, մյուս կողմից էլ գուցե արդեն ավազի՝ չափից ավելի օգտագործումն էլ բացառենք, որտեղ հնարավոր է՝ միայն աղով լուծենք, քանի որ հաջորդ խնդիրը այդ ավազի մաքրումն է»,- ասաց Ավինյանը։
Infoport
