«Ուժեղ Հայաստան» կուսակցությունն այսօր Սյունիքի մարզում՝ Ագարակում, շարունակեց նախընտրական քարոզարշավը։ Քաղաքական այդ ուժի ցուցակը գլխավորող Նարեկ Կարապետյանը բնակչության հետ հանդիպման ժամանակ շեշտեց՝ Ադրբեջանի հետ խաղաղության պայմանագիրը պետք է մեկից ավելի երաշխավորներ ունենա։
«Մենք ասում ենք՝ երաշխիք տուր, ստորագրենք, որ վաղը այնպես չլինի՝ 15 հատ թուրք գալիս է այստեղ. ի՞նչ ենք անելու։ Եթե Ադրբեջանը մեր վրա ոչ մի նկրտում չունի, խի՞ չի ուզում, որ մենք երաշխավոր ունենանք։ Գիտեք՝ ինչո՞ւ. ինքը տեղ է թողնում հետոյի»,- ասաց նա։
Նարեկ Կարապետյանն ընդգծեց՝ չպետք է ոչ մի կերպ թույլ տալ, որ Հայաստանում ադրբեջանցիներ բնակվեն։
«Մենք չպետք է թողնենք, որ իրենք գան Հայաստան։ 100 հոգի, 500 հոգի բերելով այստեղ՝ իրենք գործիք են ունենալու Հայաստանի վրա. մի հոգի մեկի հետ կռվեց, գնալու են ճնշելու ճանապարհով, ասելու են՝ անվտանգություն պետք է ապահովենք։ Մենք արդեն տվել ենք. այս մարդը Արցախը տվել է, ճանապարհը տվել է։ Միակ բանը, որ ուզում ենք, ասում ենք՝ հիմա գոնե կանգնեցնենք, չթողնենք ադրբեջանցիները մտնեն Հայաստան։ Այն, որ իրենք ասում են՝ 300 հազար ադրբեջանցի բերենք, այդ 300 հազարը ադրբեջանցիների միֆն է, այստեղ այդքան ադրբեջանցի է ապրել։ Այդ միֆը ուզում են բերել Հայաստան։
Ամենաբարդ տեղը այստեղ է լինելու ու Վարդենիսը։ Խնդիրն այն է, որ մենք չենք ուզում մի հատ էլ պայքարել, գնանք Օպերա, ասենք՝ հեռացիր։ Ընտրություններով ճամփենք, թող գնա։ Եթե մի ոտ շուտ ճամփեինք, Արցախի մի մասն էլ չէր տա, Քարվաճառն ու Լաչինն էլ չէր տա, արագ կպրծնեինք»,- հայտարարեց Նարեկ Կարապետյանը։
