Ադրբեջանը մշակութային Եղեռն է իրականացնում․ Արցախի ԿԳՄ նախարար

Ադրբեջանի կողմից հայկական մշակութային ժառանգության ոչնչացման, նենգափոխման և կեղծարարության ինստիտուցիոնալ քաղաքականություն է վարվում:

Այս մասին «Արցախի վտանգված ժառանգությունը. մարտահրավերների հանգույցում» խորագրով համաժողովից առաջ կայացած ասուլիսում ասաց Արցախի Հանրապետության ԿԳՄ նախարար Լուսինե Ղարախանյանը:

Նրա տեղեկացմամբ՝ հակառակորդի կողմից օկուպացված տարածքներում պատմամշակութային շուրջ 2000 հուշարձանի ճակատագիր է վտանգնված։

Նախարարը մանրամասնեց, որ վտանգված է 13 վանական համալիրի, 122 եկեղեցու, 52 ամրոցի, 523 խաչքարի և չորս մատուռի ճակատագիր:

Բացի այս, Լուսինե Ղարախանյանը հայտնեց, որ 127 դպրոցական գրադարանը 617 հազար գրքով մնացել է օկուպացված տարածքներում, 3 շրջանային գրադարան՝ 68 հազար 398 գրքով։ Տասը պետական և երկու մասնավոր թանգարան ևս մնացել է օկուպացված տարածքներում՝ 20 000 նմուշով:

«Հակառակորդին անցած թանգարաններից են Հադրութի Արթուր Մկրտչյանի անվան թանգարանը, որտեղ 7680 ցուցանմուշ է եղել, որոնց թվում և Մկրտչյանի անձնական իրերը, Թևան Ստեփանյանի անվան և այլ թանգարաններ։ Շուշի քաղաքի Պատմության թանգարանը՝ 5 000 ցուցանմուշով, Երկրաբանական պետական թանգարանը՝ 403 նմուշով, Կերպարվեստի պետական թանգարանը՝ 673 նմուշով, նույնպես անցել են հակառակորդի վերահսկողության տակ։ Իսկ ինչ վերաբերում է Գորգերի թանգարանին, ապա ցուցանմուշների մեծ մասը հնարավոր է եղել տարհանել, սակայն 860 նմուշ մնացել է»,- ներկայացրեց նա։

Լուսինե Ղարախանյանի խոսքով՝ Ադրբեջանի վերահսկողության տակ է մնացել նաև Տիգրանակերտի պատմահնագիտական ամրոց-թանգարանը, իսկ Հունոտի կիրճը դեռ չեզոք գոտում է:

Նա հավելեց, որ Ազոխում պեղումների ժամանակ հայտնաբերված բոլոր ցուցանմուշները տարվել են Ադրբեջան, ինչի ապացույցները կան։

Արցախի ԿԳՄ նախարարի դիտարկմամբ՝ Ադրբեջանն իր քաղաքականությունը երկու ուղղությամբ է առաջ տանում` հայկական հուշարձանների ոչնչացում և դրանց` որպես ալբանական մշակույթի մաս ներկայացնելու փորձեր։

«Սա էթնոցիդ է։ Այսօր սկսվել է երկրորդ Եղեռնը. Եղեռն` Եղեռնից հետո։ Սա հարված է մեր ինքնությանը։ Մենք տարբեր ճանապարհներով՝ խաղաղապահների, ԱԳՆ-ի և միջազգային կառույցների միջոցով փորձում ենք կանխել դա, բայց դեռ չկան սաստող այն կոնկրետ քայլերը, որոնք Ադրբեջանին ստիպեն կանգ առնել»,-նշեց նա:

Հիշեցնենք, որ Արցախյան  պատերազմից հետո Ադրբեջանը ոչնչացրել ու շարունակում է ոչնչացնել Արցախի գրավյալ տարածքներում առկա հայկական մշակութային և կրոնական ժառանգության կոթողները:

Հիշեցնենք նաև, որ ՅՈՒՆԵՍԿՕ-ի գլխավոր տնօրեն Օդրի Ազուլեն դեռեւս անցյալ տարվա նոյեմբերի 20-ին հայտարարել էր Լեռնային Ղարաբաղի պատմամշակութային հուշարձանների պաշտպանության անհրաժեշտության եւ դրանց ինքնությունը խեղաթյուրելու փորձերի անթույլատրելիության մասին: Ազուլեն առաջարկել է առաքելություն ուղարկել տարածաշրջան։ Այս նախաձեռնությունը հավանության է արժանացել կազմակերպության անդամ պետությունների կողմից, ինչն իր արտացոլումն է գտել ՅՈՒՆԵՍԿՕ-ի զինված հակամարտությունների ժամանակ մշակութային արժեքների պաշտպանության կոմիտեի 2020 թվականի դեկտեմբերի 11-ի հայտարարության մեջ: Սակայն Ադրբեջանը հետևողականորեն խոչընդոտում է ՅՈՒՆԵՍԿՕ-ի ներկայացուցիչների այցին տարածաշրջան։

Armenia Today