Մայիսի 16-ին Մոսկվայի մարզի Նովոսյոլկովո գյուղի գրադարանում բացվել է նկարիչ Անդրեյ Զագոսկինի «Քարե սիմֆոնիա» ցուցահանդեսը՝ նվիրված Հայաստանին: Գրադարանի վարիչ Սվետլանա Տրոշինան ցուցահանդեսը բացել է հայկական հեքիաթի ընթերցմամբ եւ տեղեկացրել, որ 2026 թվականը հայտարարված է Ռուսաստանի ժողովուրդների միասնության տարի: Հայերը, կազմելով ՌԴ բնակչության 0,64 տոկոսը (946 172 մարդ), 20 ազգությունների շարքում զբաղեցնում են 7-րդ տեղը:
Մի քանի տարի ապրելով Հայաստանում՝ Անդրեյ Զագոսկինը ստեղծել է հայկական թեմաներով բազմաթիվ երփնագրեր, հիմնականում՝ բնանկարներ եւ եկեղեցիներ, նաեւ՝ «Ախթամար» լեգենդը: Նկարիչը ներկաներին պատմել է Հայաստանի եւ իր աշխատանքների մասին, Երեւանը համեմատել բազմաթիվ մրգերով լցված կլոր սկուտեղի հետ: Զագոսկինը 2013 թվականից ակտիվորեն մասնակցում է ցուցահանդեսների Ռուսաստանում, իսկ Երեւանում նրա անհատական ցուցահանդեսները բացվել են «Փյունիկ» կենտրոնում եւ «Նարեկացի» արվեստի ինստիտուտում:
Ա. Բ.
