Հունվարի 9-ին, Լեհաստանի Խշանուվ քաղաքում մահացել է հայ կաթոլիկ եկեղեցու գործիչ, եկեղեցու պատմաբան, բանաստեղծ, հանրային գործիչ, հակակոմունիստական հայացքների տեր այլախոհ Տադեուշ Բոհդան Իսակովիչ-Զալեսկին: Ծնվել էր Կրակովում, լեհ հոր եւ լեհահայ մոր ընտանիքում (բանասերներ Յան եւ Թերեզա Զալեսկիներ): Ուսանել է Կրակովի հոգեւոր դպրոցում, երկու տարի ծառայել լեհական բանակում: 1970-ականների վերջին միացել է ընդհատակյա հակակոմունիստական ուսանողական շարժումներին, «Համերաշխություն» ուսանողական միությանը: Սամիզդատ եղանակով եւ տարբեր կեղծանուններով հրատարակել է «Պաշարում» (1981), «Հիշողություններ» (1985), «Կարմիր ծով» (1988) բանաստեղծական ժողովածուները: Օգնել է աղքատներին ու հաշմանդամներին, համահիմնադրել է Ալբերտ Խմիելովսկու բարեգործական հիմնադրամը: 1985-ին երկու անգամ խոշտանգվել է Լեհաստանի Անվտանգության ծառայության կողմից, իսկ մոտ քսան տարի անց՝ 2006 թվականին, սկսել է ուսումնասիրել գաղտնի ոստիկանության արխիվները, հրատարակել «Քահանաներն՝ անվտանգության ծառայություններին Կրակովի արքեպիսկոպոսության օրինակով» (լեհերեն եւ անգլերեն), ցույց տալով, որ Կրակովի արքեպիսկոպոսության 39 քահանաներ 1944-1989 թթ. համագործակցել են ռեժիմի հետ: Պայքարել է նաեւ 1939-ին Արեւմտյան Ուկրաինայում խորհրդային կառավարության կողմից իրականացված լեհերի կոտորածների դատապարտման համար, այդ մասին է 2008-ին նրա հրատարակած «Սահմանամերձ շրջանների չպատմված ցեղասպանությունը» գիրքը:
Եղել է հայ համայնքի ակտիվ գործիչ, 2001-2009 թթ.՝ լեհահայերի հոգեւոր առաջնորդ, 2009-ից՝ Գլիվիցեի հայ կաթոլիկ ծխական հովիվ Զալեսկին Լեհաստանում հանրահռչակել է իմացությունը Հայաստանի պատմության եւ մշակույթի, լեհահայության հարուստ պատմության վերաբերյալ, նախաձեռնել համագործակցություն հայ գաղթականների հին եւ նոր ալիքների միջեւ, նպաստել Կրակովում Հայոց ցեղասպանության հիշատակին նվիրված հուշարձանի կանգնեցմանը, հրատարակել «Լեհաստանի հայ քահանաների կենսագրական բառարան. 1750-2000» (2001) եւ «Հայոց արքեպիսկոպոս Իզաակ Միկոլայ Իսակովիչ» (2001) գրքերը:
Նրա մասին նկարահանվել է «Լեհաստանի անհանգիստ քահանան» վավերագրական ֆիլմը, իսկ նրա հանդեպ հալածանքներն արտահայտվել են Մաչեյ Գավլիկովսկու «Վախեցնել քահանային» ֆիլմում (2006): 2006 թվականի մայիսի 3-ին Տադեուշ Բոհդան Իսակովիչ-Զալեսկիին շնորհվել է Լեհաստանի բարձրագույն շքանշաններից «Պոլոնիա ռեսիտուտան»:
Ա. Բ.
