Artnet.com արվեստի կայքէջում Ադամ Շրադերի «Հայ արվեստագետը պայթեցրել է Հոնկոնգն իր փչովի արվեստի ցուցահանդեսով» հոդվածը ներկայացնում է այս ամիս Ջոան անունով հայաստանցի արվեստագիտուհու՝ Հոնկոնգում ներկայացված մեծածավալ փչովի ինստալացիաները եւ դրանց շուրջ եղած տարաձայնությունները:
Հոնկոնգի «Կենտրոնական վայրի կառավարում» կազմակերպությունը, որը ցուցադրության կազմակերպիչն է քաղաքի Կենտրոնական նավահանգստում, Ջոանից թույլտվություն է ստացել, որպեսզի նրա դիզայնի գաղափարները վերածի ֆիզիկական առարկաների: Բայց երբ աշխատանքները պատրաստվել են, կազմակերպիչները չեն սպասել Ջոանի հավանությանը: Արվեստագիտուհին ասել է, որ ներկայացված աշխատանքները «տգեղ տեսք ունեն», «ճիշտ համամասնություններով չեն» եւ խնդրել է ցուցադրությունը չեղարկել՝ գտնելով, որ դրանց գիշերային լուսավորությունը միայն վատթարացրել է էֆեկտը: Հոնկոնգի Ամառային փառատոնի կազմակերպիչներն առարկել են՝ Ինստագրամում գրելով, որ «Երազային լուսային էֆեկտներն իսկապես դյութիչ են»: Մինչդեռ Ջոանն ասել է, որ Սթոունհենջի կրկնօրինակը նման է «փչովի գերեզմանոցի»: «Փչովի հրաշք» ցուցահանդեսում ներկայացված մյուս հուշարձաններն են Զատկի կղզու արձանները, Գիզայի բուրգերը, Պիզայի թեք աշտարակը եւ Փարիզի Հաղթական կամարը:
Yahoo News-ին տված բացատրություններում «Կենտրոնական վայրի կառավարումն» ասել է, որ Ջոանը չի պահանջել կազմակերպիչներից ստանալ իր հավանությունը եւ խոստացել է շարունակել ցուցահանդեսը: Այն անվճար է հանրության համար եւ տեւելու է մինչեւ օգոստոսի 11-ը՝ մաս կազմելով Հոնկոնգի Ամառային փառատոնի, որը ներառում է կերպարվեստի, երաժշտական եւ մարզական բացօթյա միջոցառումներ:
Ջոանը երեւանցի արվեստագետ է, որն իր կարիերան սկսել է գովազդի եւ փաթեթավորման ձևավորման ոլորտում՝ թարմ հայացք բերելով արվեստի եւ առեւտրական գովազդի միաձուլման գաղափարին: Իր ստեղծագործական եւ գեղարվեստական հմտությունները կիրառել է մի շարք նշանավոր ապրանքանիշերի համար («Գուչի», «Վերսաչե», «Մարք Ջեյքոբս», «Վալենտինո», «Բե Էմ Վե», «Օթլի», «Ջի Սի Դի Էս»):
Ա. Բ.
