Թանգարանների միջազգային օրը Հայաստանի մշակույթի նախարարությունը ոչ թե պետք է զբաղվի հանդիսավոր միջոցառումներով, այլ պետք է հանդես գա Ղարաբաղի մշակութային ժառանգության պաշտպանությամբ: Սակայն Հայաստանի հարյուրից ավելի թանգարաններում կազմակերպված տոնական միջոցառումներից ոչ մեկը չանդրադարձավ Լեռնային Ղարաբաղի թեմային: Մայիսի 18-ի այդ օրվա երեկոյան նման հարցադրմամբ հրապարակում է արել ռուսական «Կավկազսկի ուզել» էլեկտրոնային լրատվամիջոցը:
Ըստ որոշ տեղական եւ միջազգային հասարակական կազմակերպությունների բերած գնահատումների, Թանգարանների միջազգային օրը, որը նախատեսված է թանգարանային համայնքին միավորելու եւ համաշխարհային գործընթացներին մշակութային հաստատությունների ակտիվ մասնակցությունը խթանելու համար, հաճախ իրական ազդեցություն չունի: Եվ հատկապես՝ երբ մշակութային ժառանգությունը դառնում է յուրացման, ոչնչացման ու մշակութային ձուլման պետական քաղաքականության առարկա: «Արցախի թանգարանները, որոնք պարունակում են բացառիկ հնագիտական, պատմական, ազգագրական եւ գեղարվեստական նմուշներ, ոչ միայն կորցրել են այս օրը նշելու իրավունքը, այլեւ այժմ բախվում են յուրացման, աղավաղման ու միտումնավոր ոչնչացման շատ իրական սպառնալիքի: Այս թանգարանները փաստացի ստիպված են լռել, եւ նրանց հավաքածուները ոչնչացման եզրին են»,- ասվում է «Հայկական լեռնաշխարհի մշակույթի օմբուդսմենի» ֆեյսբուքյան էջից բերված հայտարարությունում:
«ՀՀ կառավարության ներկայիս քաղաքականությունը ոչ մի կերպ չի նպաստում Արցախի մշակութային ժառանգության պահպանման հարցերի լուծմանը: ՀՀ մշակույթի նախարարությանը հասնող աշխատանքը կատարում են հասարակական կազմակերպությունները, ինչը բացարձակապես անընդունելի է, այսպես չպետք է լինի: Ես կարծում եմ, որ հայ ժողովրդի մշակութային ժառանգության պահպանման համար պատասխանատու մարմինները պետք է զբաղվեն իրենց անմիջական գործառույթներով՝ անկախ կառավարության արտաքին քաղաքականությունից… Այն աշխատանքը, որը պետք է անել հիմա, անհնար կլինի անել հետագայում, ինչը, անշուշտ, կհանգեցնի կարեւոր ազգային արժեքների կորստի»,- «Կավկազսկի ուզել»-ի թղթակցին ասել է «Արցախի մշակույթի եւ զբոսաշրջության զարգացման գործակալություն» ՀԿ-ի նախագահ, Լեռնային Ղարաբաղի մշակույթի նախկին նախարար Սերգեյ Շահվերդյանը:
Վերջինս, ըստ հրապարակման, նշել է, թե «Արցախի 28 թանգարաններ իրենց եզակի հավաքածուներով մեզ համար կորած են, բնականաբար՝ ամեն ինչ յուրացվել է Ադրբեջանի կողմից»:
ԳԵՂԱՄ ՄԿՐՏՉՅԱՆ
