Կինոյի լեգենդ Սերգեյ Փարաջանովի 100-ամյակի առթիվ, որն ընդգրկված է ՅՈՒՆԵՍԿՕ-ի 2024 թվականի նշանակալից իրադարձությունների ցանկում, հոկտեմբերի 5-ից 30-ը Մոսկվայում անցկացվում է «Փարաջանով-ֆեստ» («Parajanov-fest») համառուսաստանյան մեծ փառատոն: Այն կազմակերպել են Մոսկվայի իր անունը կրող թատրոնը եւ ՌԴ-ում Հայաստանի դեսպանության մշակույթի կենտրոնը՝ Ռուսաստանի մշակույթի նախարարության աջակցությամբ:
Ինչպես նշված է այս առթիվ ստեղծված հատուկ կայքում, փառատոնի նպատակն է մեր դժվարին ժամանակներում վեր հանել մեծ Վարպետի ստեղծագործությանը հատուկ հոգեւոր վեհ իդեալները, նրա փիլիսոփայության գեղեցկությունը եւ բարոյականության ու մարդասիրության բարձր աստիճանը: Փառատոնին կմասնակցեն մշակույթի եւ արվեստի ոլորտների հայտնի դեմքեր: Նախատեսված միջոցառումների շարքում Մոսկվայում կբացվի «Փարաջանովի ստվերները» յուրատեսակ ցուցահանդես, որտեղ կներկայացվեն ժամանակակից 100 նկարիչների գործեր՝ նվիրված Վարպետի 100-ամյակին: Փառատոնին նաեւ կներկայացվի տարբեր հեղինակների լուսանկարչական ցուցահանդես, կցուցադրվի հայ դիզայներ Լիլիթ Մելիքյանի «Փարաջանովի յոթը խորհրդանիշները» հեղինակային հավաքածուն:
Նախատեսվում է ցուցադրել Վարպետի մասին վավերագրական ֆիլմեր, «Նռան գույնը» ֆիլմի հետահայաց ցուցադրում, Փարաջանովի անվան թատրոնի «Սիրով վրեժխնդիր եմ լինելու աշխարհից» բեմադրությունը, կազմակերպել մուլտիմեդիա-միջոցառումներ, ստեղծագործական հանդիպումներ արվեստի նշանավոր վարպետների հետ, կլոր սեղաններ, մամուլի ասուլիսներ եւ այլն: Փառատոնը կեզրափակվի Ռուսաստանի բանակի կենտրոնական տանը տեղի ունենալիք փարաջանովյան մեծ գալա համերգով, որին կմասնակցեն երգչուհի Մարիամ Մերաբովան, պարահանդեսային պարերի աշխարհի չեմպիոններ Արսեն Աղամալյանը եւ Օքսանա Վասիլեւան, Սոֆի Դեւոյանի Պարի եւ հոգու թատրոնը, Հայաստանի ժողովրդական արտիստ Բարսեղ Թումանյանը եւ այլ կատարողներ:
Կազմակերպիչները հույս են հայտնում, որ նման մասշտաբային նախագիծն անտարակույս կդառնա Ռուսաստանի մշակութային կյանքի նշանակալից իրադարձություններից մեկը, ցույց տալով մեր բարդ ժամանակներում արվեստի ուժը, հոգեւոր գաղափարատիպերի եւ բարոյական արժեքների վերածնման ընդհանուր կամքը:
ԳԵՂԱՄ ՄԿՐՏՉՅԱՆ
