Մինասի երկու որմնանկարները տեղափոխվել են նկարչի Ջաջուռի թանգարան

Մինաս Ավետիսյանի «Հանդիպում» եւ «Խաչքարի մոտ» որմնանկարները օրեր առաջ ՀՀ կառավարության շենքից տեղափոխվել են նկարչի ծննդավայր Ջաջուռ գյուղի (Շիրակի մարզ) իր թանգարան: Այս մասին կառավարության համապատասխան որոշում էր եղել դեռ հունիսի 26-ին, իսկ նախկին տեղից հանելը, տեղափոխելն ու վերատեղադրելը նուրբ եւ ժամանակատար աշխատանք է:

Մեծ նկարիչն իր տարբեր որմնանկարներն արել է 1970-1974 թվականներին՝ Շիրակի մարզի արտադրական, մշակութային եւ այլ կառույցներում ու Երեւանում: 1988-ի երկրաշարժից հետո, երբ նաեւ շենքերից շատերը տուժել էին աղետից ու  որմնանկարները վնասվել կամ վտանգվել, առաջ էր եկել դրանք կորստից փրկելու, նորոգելու ու ապահով պայմաններում տեղադրելու անհրաժեշտություն: 2008 թվականին սկսվում է «Թորոս Ռոսլինի ծնունդը» որմնանկարի վերականգնումը, իտալացի մասնագետների ներգրավմամբ այն 2009 թվականին վերականգնված   տեղափոխվում է նկարչի տուն-թանգարան: Իսկ 2010 թվականին հիշյալ երկու որմնանկարները վերականգնվելով, կառավարության որոշմամբ Լենինական-Գյումրու էլեկտրատեխնիկական գործարանի նախկին ճաշարանի շենքից տեղափոխվում են Երեւան՝ ՀՀ կառավարական համար 1 շենքի 3-րդ հարկի նիստերի մեծ դահլիճ, բողոքի ալիք բարձրացնելով Գյումրու հասարակության շրջանում: Նման հակազդեցություն էր առաջացել նաեւ քաղաքի երկու տարբեր գործարանների շենքերում եղած «Երկանք» եւ «Թել են մանում» որմնանկարների մայրաքաղաք տեղափոխման հետ կապված, որոնք վերականգնումից հետո տեղադրվել եւ գտնվում են «Զվարթնոց» օդանավակայանում: 

Ինչպես ժամանակին հայտնել է գեղանկարչի որդին՝ Ջաջուռի Մինաս Ավետիսյանի թանգարանի տնօրեն Արման Ավետիսյանը, ի վերջո Մինասի գրեթե բոլոր որմնանկարների խնդիրը դրական լուծված է, ընդհանուր 11-ից միայն 1-ը հնարավոր չի եղել փրկել, դրանից մնացած հատվածը ցուցադրվում է թանգարանում: Որմնանկարները գտնվում են Գյումրիում, Շիրակի Ազատան, Վահրամաբերդ գյուղերում, Երեւանում: Դրանք համարվում են պետական հուշարձաններ:

Մինաս Ավետիսյանի «Հանդիպում» եւ «Խաչքարի մոտ» որմնանկարների «տունդարձը» ողջունելի իրադարձություն է: ԿԳՄՍ նախարարության գնահատմամբ, այդ տեղափոխումը հնարավորություն կտա որմնանկարները ցուցադրել թանգարանային միջավայրում՝ հեղինակի այլ ստեղծագործությունների հետ համատեղ, ինչպես նաեւ հանրության համար հնարավորություն կստեղծվի թանգարան այցելելով՝ դրանք տեսնել:

ԳԵՂԱՄ ՄԿՐՏՉՅԱՆ