Գյումրու Մարիամ եւ Երանուհի Ասլամազյան քույրերի պատկերասրահը երկրորդ անգամ հյուրընկալել է ՀՀ վաստակավոր նկարիչ Սամվել Լաճիկյանի գործերի ցուցահանդեսը: Առաջինը անցած աշնանը ներկայացված նրա ջրաներկ աշխատանքների ցուցադրությունն էր, իսկ այս անգամ, Սուրբ Զատկին ընդառաջ, ներկայացված է նկարչի հոգեւոր թեմաներով ստեղծագործությունների ընտրանին: «Սուրբ Հարության խորհրդով» խորագիրը կրող այս ցուցահանդեսի բացումը տեղի ունեցավ անցած ուրբաթ՝ մարտի վերջին օրը:
Այս տարվա հոկտեմբերին լրանալու է Գյումրիում ապրող ու ստեղծագործող արվեստագետի ծննդյան 70 տարին, որի առթիվ այդ օրերին նրա հոբելյանական մեծ ցուցահանդեսը կազմակերպվելու է Երեւանում՝ Հայաստանի նկարիչների միության մեծ ցուցասրահում: Այդտեղ ներկայացվելիք գեղանկարչական աշխատանքները Լաճիկյանը որոշել է նախ եւ առաջ ցուցադրել հայրենի քաղաքում, որտեղ առանձին կներկայացվեն նաեւ նրա գորգանկարները:
Հոգեւոր, Աստվածաշնչյան թեմաներով տարբեր տարիների ստեղծված ներկա գործերը ցուցադրվում են առաջին անգամ: Դրանց ստեղծման գործում «հատկապես հայ միջնադարյան մանրանկարչության էջերն ինձ նոր ուժ ու լիցք հաղորդեցին», նշեց նկարիչը: Այս կտավները մեր մանրանկարիչների գործերի նորովի «ընթերցումներ» են ու նույն թեմաների հեղինակային ինքնօրինակ անդրադարձներ: Երբեմն միեւնույն թեման՝ «Մուտք Երուսաղեմ», «Խորհրդավոր ընթրիք» եւ այլն, նկարչի հոգեվիճակներով պայմանավորված, տարբեր տարիների տարբեր մեկնաբանություն է ստացել: Հայ նկարչի «Խորհրդավոր ընթրիք»-ներից մեկն էլ ժամանակին տեղ է գտել աշխարհահռչակ փոփ-աստղ Մայքլ Ջեքսոնի հավաքածուում՝ արժանանալով նրա առանձնահատուկ վերաբերմունքին:
Իսկ Քրիստոս Փրկչի լաճիկյանական դիմապատկերները ծնվել են արցախյան երկրորդ պատերազմի օրերին ու դրանց հաջորդած շրջանում՝ հարդյունս արվեստագետին համակած ապրումների ու մտորումների: Այս եւ ներկայացված մյուս ստեղծագործությունները միավորելով «Սուրբ Հարության խորհրդով» խորագրի ներքո, ինչպես նշվում է օրվա մամուլի հաղորդագրությունում, Սամվել Լաճիկյանն իր գեղարվեստական ուղերձն է հղում մեզ ու աշխարհին՝ փոխանցելով ոչ միայն Բարձրյալի հրաշափառ Հարության, այլեւ մեր ժողովրդի Վերածնության ցանկալի ավետիսը:
Գնահատելի է, որ արվեստի այս ցուցահանդեսի բացմանը ներկա էին ու ողջունեցին Գյումրու քաղաքապետ Վարդգես Սամսոնյանը եւ համայնքապետարանի մշակույթի ու երիտասարդության հարցերի բաժնի պետը: Նրանք նաեւ անակնկալ ունեին արվեստագետի այդտեղ ներկա եղբոր՝ ճանաչված գեղագետ, արվեստաբան եւ գծանկարիչ, Երեւանի պետական համալսարանի դասախոս Լեւոն Լաճիկյանի համար: Գյումրու մշակութային ավանդույթների պահպանման եւ զարգացման գործում ներդրած նշանակալի ավանդի եւ արվեստի ոլորտում բազմամյա գործունեության համար, նաեւ հաշվի առնելով «Շիրակ» հայրենակցական միավորման միջնորդագիրը, համայնքի ղեկավարը «Ազգ»ի մեր վաղեմի գործընկերոջն ու սպասված հեղինակին պարգեւատրեց Գյումրու քաղաքապետարանի Ոսկե հուշամեդալով:
Սամվել Լաճիկյանի գործերի ներկա ցուցահանդեսն Ասլամազյան քույրերի պատկերասրահում բաց կլինի մինչեւ ապրիլի 9-ը ներառյալ:
ԳԵՂԱՄ ՄԿՐՏՉՅԱՆ
Հ. Գ. Ի դեպ, բարեկամական մի նկատառում՝ կապված «Կումայրի» պատմաճարտարապետական արգելոց-թանգարանի տարածքում ընդգրկված արվեստի այս կարեւոր օջախի անվան հետ: Այն ինչպես պատկերասրահի էլեկտրոնային պաշտոնական կայքում, այնպես էլ ֆեյսբուքյան էջում գրված է միայն անգլերեն: Մինչդեռ ինչպես ազգային արժանապատվության, այնպես էլ դրանից բխող պետական օրենքի պահանջով պետք է որ գրված լինի նախ հայերեն, հետո միայն որեւէ այլ լեզվով:
