«Գյումրի եւ ավելին»

Մեր ժամանակների ճանաչված արվեստագետներից է գեղագետ, արվեստաբան-գծանկարիչ, ԵՊՀ դոցենտ Լեւոն Լաճիկյանը: Ծնվել է Գյումրիում՝ նկարիչների ընտանիքում: Նկարել է հայրը, նկարում է ավագ եղբայրը՝ ՀՀ վաստակավոր նկարիչ Սամվել Լաճիկյանը: Նրա գիտական ու արվեստաբանական հողվածները տպագրվել են հայագիտական նշանավոր հանդեսներում ու հանրագիտարաններում, լույս տեսել աոանձին գրքերով՝ Երեւանում ու Նյու Յորքում:

Արդեն մի քանի տասնամյակ նա իր գրիչն ու ջանքերը ծառայեցնում է նաեւ ժամանակակից հայ մշակութային կյանքի լուսաբանման կարեւոր գործին: Ավելին՝ նաեւ մասնակիցն է գրական-մշակութային այդ ընթացքի՝ Հայաստանի ու Սփյուռքի մամուլում եւ հատկապես «Ազգ» թերթում տպագրած իր բազմաթիվ հրապարակումներով, վերջին տարիներին՝ նաեւ գծանկարներով: Արվեստաբանությունից սահուն անցում կատարելով դեպի նկարչություն՝ Լեւոն Լաճիկյանն արդեն ստեղծել է քաղաքային տեսարանների տպավորիչ նկարաշարեր՝ արժանիորեն ձեռք բերելով «քաղաքերգակ» նկարչի համբավ:  

Օրերս «Թեքեյան» կենտրոնում բացվեց Լեւոն Լաճիկյանի «Գյումրի եւ ավելին» խորագրով ցուցահանդեսը՝ թվով 18-րդը արվեստագետի ստեղծագործական կենսագրության մեջ: Ներկայացված են շուրջ 7 տասնյակ գծանկարներ, որոնց առանցքը կազմում է  Լաճիկյանի Գյումրիապատումը: Նա նուրբ գծերով եւ զուսպ գուներագներով է իր սերը փոխանցում առ հարազատ ծննդավայրը: Մեր զրույցի ընթացքում նկարիչը խոստովանեց, որ ինքը մտովի կատարյալ է տեսնում Գյումրին եւ ուզում է բոլորին ի ցույց դնել նրա ազնվական դիմագիծը:

Ցուցահանդեսում գյումրիապատումի կողքին ներկայացված են նաեւ քաղաքային տեսարաններ Փարիզից, Մարսելից, Վենետիկից, Պրահայից եւ այլ գեղեցկագույն քաղաքներից, որտեղ գործի բերումով եղել է արվեստաբան-գծանկարիչը:

«Գյումրի եւ ավելին» ցուցահանդեսի մաս է կազմում նաեւ Լաճիկյանի գրաֆիկական եկեղեցապատումը: Արվեստասերին ներկայացված են եկեղեցիներ ու վանքեր Հայաստանից, Արցախ աշխարհից եւ արտերկրից: Այստեղ կարելի է տեսնել թե՛ Սինգապուրի Սուրբ Գրիգոր Լուսավորիչ հայկական եկեղեցին եւ թե՛ Ոսկեպարի Սուրբ Աստվածածինը: Հուզիչ է, իհարկե, այս վերջին գծանկարը, որտեղ 7-րդ դարի հայկական պաշտամունքային կառույցը գծանկարված է մի տեսակ մեկուսի ու տխուր գուներանգներով…

Դիտարժան այս ցուցահանդեսը բաց է լինելու մինչեւ մայիսի 7-ը:

ՀՐԱՉՅԱ ԲԱԼՈՅԱՆ (Արմենյան)