Նկարչուհի Սուսան Ավանեսյանին դիմանկարի ժանրը հնարավորություն է տվել իրականացնել վաղուցվա մտահղացումը` ստեղծել մեծ շարք, որտեղ կներառվեն տարբեր ժամանակաշրջաններում ապրած եւ հայ ժողովրդի կյանքում մեծ ներդրում ուեցած մարդկանց` հայի լավագույն տեսակի դիմանկարները: Նվիրյալների, որոնք չեն խնայել իրենց ունեցած ամենաթանկ բանը` կյանքը հանուն երկրի ու ժողովրդի: Այդ տեսակին գտնելու եւ արժեվորելու համար նախ պետք էր ուսումնասիրել երկրի ու ժողովրդի պատմությունը, այդ պատմությունը կերտած հերոսների կենսագրությունը:
Սուսան Ավանեսյանի` տարիներով ստեղծված եւ «Հերոսամարտ» խորագիրը կրող դիմանկարների ցուցահանդեսը բացվել է Հայաստանի Նկարչի տանը:: Միանգամից ասենք` սովորական դիմանկարներ չեք տեսնելու, եթե այցելեք ցուցահանդես: Տեսնելու եք հայերիս համար թանկ ու կարեւոր, նշանակալից եւ գնահատելի մարդկանց դիմանկարներ: Այդ մարդիկ նկարչուհու հերոսներն են դարձել: Հերոսներ` նախ բառի իսկական, ապա նաեւ փոխաբերական իմաստներով:Հերոսների դեպքում դա Նժդեհն է, Արամ Մանուկյանը, Կոմանդոսը, Լեոնիդ Ազգալդյանը,44-օրյա պատերամում նահատակված մեր հերոսները, տարբեր ժամանակներում փայլատակած մեր շատ քաջեր: Նկարչուհու հերոսներն են դարձել նաեւ մեր ոլորտային խորհրդանիշները, մշակույթի, պատմության, գրականության նշանակալից դեմքեր` Արտակ Մովսիսյան, Պարիս Հերունի, Կոմիտաս, Զապել Եսայան, Անդրանիկ, այլք: Նկարչուհու շարքը հիանալի մտահղացում է` դիմանկարների միջոցով ներկայացնել հայ հերոսների քաջագործությունները, մեր պատմության, մշակույթի, գրականության նշանակալից ակնթարթները, երեւույթները` դրանց ստեղծողների դիմանկարների միջոցով, այդ դիմանկարներն առիթ դարձնելով: Մի քանի տասնյակ հիանալի, ջղուտ, միաժամանակ պայծառ շեշտադրումներով դիմանկարները մի ողջ հայկական աշխարհ (նաեւ` այլազգի հերոսների դիմանկարներ կան) ներկայացնող պատումների շարք են` հիշողություններ արթնացնող, իրադարձություններ պատմող, մեր անցյալի եւ ներկայի ազնվագույն պահերն ու դեմքերը հիշեցնող: Դիմանկարները հարուստ ներաշխարհ, հոգու մեծ լիցք եւ մեծ զգացումներ ունեցող մարդկանց աշխարհ է, որ ստեղծել է նկարչուհու զգայուն վրձինը:
ՄԱՐԻԵՏԱ ԽԱՉԱՏՐՅԱՆ
