Ֆեյսբուքյան ասուլիսի ժամանակ հարց է հնչել՝ հնարավո՞ր է, որ այս բանակցությունները հանգեցնեն խաղաղության պայմանագրի կնքմանը, Փաշինյանը պատասխանել է. «Իհարկե խաղաղության պայմանագրի կնքմամբ ու դրա շուրջ բանակցությունների մեկնարկով շահագրգռված ենք: Վերջերս համանախագահներն էլ բանակցային մի օրակարգ էին առաջարկել, որոնցից մեկը հենց խաղաղ ու համապարփակ կարգավորման խնդիրն էր: Մենք չենք հրաժարվել եւ չենք հրաժարվելու այդ թեմայով խոսել: Եթե մենք հռչակել ենք, որ խաղաղության դարաշրջան ենք ուզում բացել, անտրամաբանական կլինի, որ ասենք՝ չենք ուզում լսել խաղաղության պայմանագրի մասին: Դա մեր նպատակներից մեկն է:
Նաեւ քարոզչական քաոսի պատճառով անընդհատ փորձ է արվում տպավորություն ստեղծել, թե մենք դեմարկացիայի եւ դելիմիտացիային դեմ ենք, չենք ուզում.չկա նման բան: Տպավորություն է ստացվում, որ մենք Լեռնային Ղարաբաղի խնդրի համապարփակ կարգավորմանը դեմ ենք, իհարկե կողմ ենք, իհարկե շահագրգռված ենք:
Եթե մեզ հաջողվի ձեւակերպել խաղաղության այնպիսի մոդել, որը ձեռնտու կլինի երկու կողմերին, այդ պարագայում գուցե թե բանակցային սեղանն ավելի պակաս հակամարտության կամ հակադրության դաշտ լինի և ավելի շատ դիմացինի տեսակետը հասկանալու և այդ տեսակետներից ինչ-որ ընդունելի դրույթներ դուրս բերելու և ինչ-որ նոր սխեմա ձեւավորելու հնարավորություն լինի»:
