«Հանրության շրջանում կարծիք է ձևավորվել, որ մենք որևէ խնդիր լուծելու, ստեղծված իրավիճակից դուրս գալու հնարավորություն այլևս չունենք․ Եթե երկրում արմատական փոփոխություն իրականացնելու հնարավորություն ունենանք, իսկ խանգարող գործոնը մի մարդ է՝ Նիկոլ Փաշինյանը, որոշակի ժամանակահատվածում մենք կարող ենք իրավիճակը կտրուկ փոխել»,-համոզված է «Պատիվ ունեմ» խմբակցության պատգամավոր Տիգրան Աբրահամյանը։
Ռազմական փորձագետը նշեց, որ Փաշինյանն ու նրա իշխանությունը առաջնագծին՝ որպես համակարգի, մեծ վնաս են տվել, կազմաքանդել են։ Ադրբեջանն այսօր վերահսկում է Հայաստանի բնակավայրերը, ենթակառուցվածքները, մեր ռեսուրսները։ Անգամ այս պարագայում բեկում մտցնելու հնարավորություն կա։ Փաշինյանը մի համակարգ է ստեղծել, որը թույլ չի տալիս, որ ռազմական ոլորտն ամրանա։ Երբ Փաշինյանը բուրգի գագաթից հեռանա, իր ստեղծած համակարգերը կփլուզվեն. համոզված է Տիգրան Աբրահամյանը։
«Կան մարդիկ, որոնք այսօր Զինված ուժերում չեն, բայց որևէ պահի կարող են վերադառնալ և համակարգը դուրս բերել այս վիճակից։ Բանակցություններն էլ են կարևոր, բայց շատ կարևոր է, թե բանակցելիս քո թիկունքում ինչպիսի Զինված ուժեր ունես, ու դրանից է կախված, թե բանակցելիս ինչպիսի դիրքերից ես հանդես գալիս։ Ահռելի աշխատանք կա այդ ճակատում, բայց ուզում եմ լույս ցույց տալ, որ մեր հասարակությունը չմտածի, թե ամեն ինչ ավարտված է»,- ասաց պատգամավորը։
Հանրության շրջանում ձևավորված այն տրամադրությունն ու համոզմունքը, թե մեզ այլևս ոչինչ չի փրկի, ժողովուրդն այլև չի պայքարում, դիմադրելու հնարավորություն չկա, հենց իշխանություններն են ձևավորել։ Եվ ինչո՞ւ է դա արվել, որպեսզի եթե վաղը խայտառակ փաստաթուղթ ստորագրվի, հանրության համար այն հեշտ ընդունելի ու մարսելի դառնա։
