Ցահալը կիրառում է արհեստական բանականությամբ զենք
Այն՝ ինչ այսօր, հոկտեմբերի 7-ից ի վեր, տեղի է ունենում Գազայում եւ դրա շուրջը, միջնադարյան ամենավայրագ դրվագներն է հիշեցնում, միայն թե՝ կատարելագործված զինատեսակների առկայությամբ՝ ավելի զանգվածային, շատ ավելի մահաբեր: 153 օր առաջ «Համասի» անակնկալ հրթիռակոծություններից շուրջ 1200 զոհված հրեաների դիմաց պաղեստինցի արաբներն արդեն ունեն 31 հազար զոհ, որոնցից 12 հազարը՝ երեխաներ: Թիրախավորելով նաեւ վերջիններին՝ իսրայելական բանակը՝ Ցահալը, կարծեք իրականացնում է պաշտպանության նախկին նախարար, ապա վարչապետ եւ պաղեստինյան Սաբրա-Շաթիլա գաղթակայանի սպանդի կազմակերպիչ Արիել Շարոնի պատվերը. «Պաղեստինցի յուրաքանչյուր կնոջ փորի մեջ մի ահաբեկիչ է նստած, պետք է ոչնչացնել բոլորին»:
Եվ «ոչնչացման» գործողությունները շարունակվում են անընդհատ, ցամաքից, օդից ու ծովից, շուրջ 2,5 միլիոն բնակչությամբ Գազայի հատվածի, հարակից Ռաֆահ, Խան Յունիս եւ այլ բնակավայրերի վրա, որոնք շրջափակված են ամեն կողմից, ներառյալ Եգիպտոսի, որը մեծ արագությամբ պարիսպ է կառուցում աղիտահար իր ազգակիցների ներխուժումը կանխարգելելու համար: Թիրախում են հատկապես հիվանդանոցներն ու ՄԱԿ-ի UNRWA բարեգործական հիմնարկները, որոնք սովահար ազգաբնակչության վերջին հույսն են կենդանի մնալու: Թիրախ են դարձել նույնիսկ միջազգային մարդասիրական օգնության համար հազվադեպ բացվող միջանցքներում կուտակված սովալլուկ մարդիկ:
Վայրագության մեջ իսրայելացիներին ոչնչով չեն զիջում պաղեստինցիները, որոնք, առիթի դեպքում, ինչպես հոկտեմբերի 7-ին, չխնայեցին երիտասարդական բացօթյա ֆեստիվալի բոլորովին անպաշտպան մասնակիցներին, հետագայում նրանց իրենց կալանավորների հետ փոխանակելու առաջադրանքով: Ստեպ-ստեպ փոխանակման գործը առաջ է գնում, սովորաբար՝ մեկ առեւանգվածի դիմաց 10 կալանավոր սկզբունքով: Սակայն մինչ այդ, համասականները, հավատարիմ իրենց բնազդին՝ բռնաբարում են, հաճախ՝ խմբակային, առեւանգվածներին, ինչի մասին վկայում են տեղում գործող ՄԱԿ-ի դիտորդները:
Փոխադարձ վայրագությունների այս ֆոնին տեղի է ունենում հակամարդակային մի այլ գործընթաց նաեւ, որի մասին տեղեկացնում են միջազգային հեղինակավոր լրատվամիջոցները՝ BBC, CNN, Al Jazeera եւ այլ: Պարզվում է, որ Ցահալը, բացի իր ավանդական զենքերից, Գազայի վրա եւ շուրջը փորձարկում է իր նորահնար զինատեսակները: Այլ խոսքով՝ Գազան դարձել է Ցահալի փորձադաշտը, վերոհիշյալ լրատվամիջոցների բնորոշմամբ՝ «լաբորատորիան»: Տարբեր զինատեսակների կողքին, որոնք մեծ պահանջարկ ունեն տարբեր երկրների կողմից, այդ «լաբորատորիայում» առաջին անգամ աշխարհում, բացառությամբ Մ. Նահանգների, գործնական կիրառման փուլ են անցնում արհեստական բանականությամբ (artificial intelligence կամ AI) եւ ԱԹՍ-ներով օժտված ռոբոտների միջոցով գործող զինատեսակները: Դրանք հաջողությամբ կիրառվում են արդեն «Համասի» հրամանատարական կազմի անդամներին «որսալու» նպատակով: Դրանք անցյալ շաբաթ կիրառվեցին նաեւ ծովեզերքի ավազների վրա ֆուտբոլի գնդակ «տշող» պաղեստինցի 4 անչափահասների վրա՝ նրանց «շփոթելով», ինչպես հայտարարվեց հետո, «ահաբեկիչների» հետ…
Համենայնդեպս, կարելի է պատկերացնել, թե աշխարհում թմրամիջոցային բիզնեսից հետո ամենաշահավետը համարվող զենքի առեւտուրի շուկայում հետագայում ի՛նչ նշանակություն է ունենալու նորագույն այդ զինատեսակների մասսայականացումը, նաեւ՝ դրանց անցումը, ասենք, հանցագործ շրջանակների ձեռքը:
Եվ հրեան հրեա չէր լինի, եթե այս անգամ էլ չտրվեր իր բնազդին, առեւտրականի իր տաղանդին, թեկուզ՝ Մահվան Վաճառականությանը, ինչպիսին եղավ մեր դեպքում, Աշքելոնի օդակայանից Բաքու թռչող բազմատասնյակ օդանավերի ծանր, մեզ համար մահաբեր բեռներով…
Ասում են, որ Գազայի մոտակա շրջաններում այս օրերին վխտում են զենքի առեւտրով զբաղվող միջնորդները: Դրանց շարքում, անկասկած, պետք է լինեն Իսրայելի կարեւոր հաճախորդը համարվող ադրբեջանցի կամ նախկին ադրբեջանցի գործակալները: Մեր համապատասխան ծառայությունները հետեւո՞ւմ են նրանց:
Չեմ կարծում: Չէ՞ որ մենք «խաղաղության դարաշրջան» ենք կերտում:
ՀԱԿՈԲ ԱՎԵՏԻՔՅԱՆ
