ՀՀ երրորդ նախագահ Սերժ Սարգսյանը հունվարի 31-ին ԼՂ հիմնախնդրի բանակցային գործընթացի վերաբերյալ հարցազրույցում ասել է, որ Արցախն Ադրբեջանի կազմում չի կարող լինել։
2016 թվականի ապրիլյան պատերազմից հետո Ադրբեջանի հետ բանակցությունների վերաբերյալ նա ասել է. «Որևէ ճնշում, որևէ զիջում չի եղել։ Երբ խոսել եմ ապրիլյան պատերազմի մասին, բացահայտ ասել եմ, որ պատերազմի դադարեցման մասին պայմանավորվածությունը եղել է բանավոր։ Նոր փաստաթուղթ չի եղել. դա հաստատեցին նաև համանախագահները, և ուժի մեջ մտավ 1994 թվականի հրադադարի պայմանագիրը։
2016 թվականին՝ ապրիլյան պատերազմից հետո, մենք համանապագահներից առաջարկ ենք ստացել, որը որևէ կերպ չէին խախտում կարմիր գծերը՝ ԼՂ ինքնորոշման, Հայաստանի և Լեռնային Ղարաբաղի միջև ցամաքային ճանապարհի, միջազգային ճանաման հարցերը։
Մենք միշտ ընդգծել ենք, որ անգության երաշխիքներից ամենակարևորն անկախությունն է, որը քո հնարավորությունն է օրինական կերպով ազդելու բոլոր գործընթացների վրա։ Այս կետերի հետ կապված որևէ փոփոխություն 2016 թվականին չի եղել»։
«Մենք, ի՞նչ է, ֆաշի՞ստ ենք, մենք ռասի՞ստ ենք, որ ասենք Լեռնային Ղարաբաղի՝ Արցախի խորհրդարանը պետք է բաղկացած լինի զուտ հայերից»,- հարցազրույցի ժամանակ ասել է ՀՀ երրորդ նախագահը՝ անդրադառնալով Փաշինյանի փաստարկներին, թե եթե Լեռնային Ղարաբաղում ընտրություններ լինեին, ադրբեջանցիներ էլ կընտրվեին, հետեւաբար Արցախը զուտ հայկական չէր լինելու:
«Եթե զուտ հայերից չի բաղկացած, դա նշանակում է, որ հայկական չի՞: Այսօր Հայաստանի Ազգային ժողովում զուտ հայե՞ր են ընտրված որպես պատգամավոր: Այսինքն՝ ինչի՞ մասին է խոսքը: Եթե սա մանիպուլյացիա է, ապա չհաջողված մանիպուլյացիա է: Եթե սա, ինչ ասեմ, գիտելիքի խնդիր է, ապա զավեշտական է: Եվ իմ ասածը նաև, իհարկե, մեսիջ է միջազգային հանրությանը, որովհետև նույն համանախագահները, նույնիսկ կործանարար պատերազմից հետո, էլի խոսում էին հիմնարար սկզբունքների մասին»,-ասել է Սերժ Սարգսյանը։
