ՀՀ նախագահի գրասենյակից հայտնում են, որ Վահագն Խաչատուրյանը Քաթարի միջազգային տնտեսական համաժողովի շրջանակում որոշ հանդիպումներ է անցկացրել։ Նշվում է Արժույթի միջազգային հիմնադրամի նախագահի և Քաթարի պետնախարարի հետ անցկացված հանդիպումների մասին. ՀՀ նախագահի՝ Քաթար կատարած այցի մասին պատմում է քաղաքական գիտությունների դոկտոր, էներգետիկ և տրանսպորտային-լոգիստիկ անվտանգության հարցերով փորձագետ Վահե Դավթյանը։
Նա շարունակել է.
Ինքս ամբողջ շաբաթ լինելով Քաթարում` բաց չեմ թողել համաժողովի շրջանակներում անցկացված ոչ մի քննարկում և կարող եմ փաստել հետևյալը.
1. Համաժողովին եկած ԲՈԼՈՐ նախագահներն ու վարչապետները մասնակցել են տարբեր բաց քննարկումների, հանդես եկել հրապարակային ելույթներով։ Վահագն Խաչատուրյանը չկար նրանց շարքում։
2. Վահագն Խաչատուրյանը չկար նաև համաժողովի մասնակիցների հրապարակված ցուցակում։
3. Ինքս առավոտից երեկո մասնակցելով համաժողովի աշխատանքներին` որևէ տեղ ու որևէ կարգավիճակում չեմ տեսել Վահագն Խաչատուրյանին։
Նշված անձնավորությունն, իհարկե, եղել է Քաթարում այդ օրերին` անցկացնելով 1֊2 ֆորմալ հանդիպում ու շփվելով հայկական համայնքի մի քանի ներկայացուցիչների հետ։ Արդյունքում մամլո հաղորդագրության մեջ գոնե գրելու բան եղավ։
Սա էր վոյաժի ողջ ՕԳԳ֊ն։
Մինչդեռ Քաթարի միջազգային տնտեսական համաժողովը գլոբալ նշանակության միջոցառում է, որին մասնակցած տարբեր առաջնորդներ օգտագործեցին այն որպես հարթակ` սեփական երկրի շահերը ներկայացնելու համար։ Այս առումով հատկապես աչքի ընկան Իրաքլի Ղարիբաշվիլիի, Վիկտոր Օրբանի, Շեյհ Հասինայի, Աբդո Բենիտեզի, Պոլ Կագամեի, արաբական աշխարհի առաջնորդների և այլոց ելույթները։
