«Քիչ առաջ ավարտվեց Արցախ-Հայաստան միակ ճանապարհի ադրբեջանական արգելափակման վերաբերյալ ՄԱԿ-ի Անվտանգության խորհրդի քննարկումը»,- ՄԱԿ-ի Անվտանգության խորհրդում Բերձորի միջանցքի խնդրի քննարկմանն անդրադարձել է Արցախի պետնախարարի խորհրդական Արտակ Բեգլարյանը։
Նա ՀՀ նախկին ՄԻՊ Արման Թաթոյանի, Արցախի ՄԻՊ Գեղամ Ստեփանյանի հետ ՄԱԿ-ի նիստի ուղիղ հեռարձակմանը հետևել է ՀՀ-ում ՄԱԿ-ի գրասենյակի պարիսպների մոտ։
Ինչպես հայտնի է, արդեն 9 օր Արտակ Բագլարյանն այնտեղ շուրջօրյա նստացույց է անում։
Բերձորի միջանցքի քննարկման մասին նա նկատել է. «Բավականին արժեքավոր հայտարարություններ եղան տարբեր պետությունների կողմից, և կարող ենք ասել, որ գրեթե բոլոր անդամ երկրները պարզորեն ընդգծել են Ադրբեջանի կողմից Արցախի շրջափակման անթույլատրելիությունը և դրա անհապաղ վերացման անհրաժեշտությունը:
Որպես ՄԱԿ-ի միջամտության հրատապ միջոցներից մեկը՝ ահա հենց այս քննարկման մասին էինք խոսում մեր պահանջներում ՄԱԿ-ի հայաստանյան գրասենյակի առջև բողոքի ակցիաների ժամանակ: Ուրախ եմ, որ ՀՀ դիմումի հիման վրա հաջողվել է նման քննարկում կազմակերպել, սակայն սա Արցախի կարճաժամկետ ու երկարաժամկետ հիմնախնդիրների լուծման գործում ՄԱԿ-ի ակտիվ ու համապարփակ ներգրավման գործընթացի միայն սկիզբն է:
Հուսամ՝ Ֆրանսիայի առաջարկած հայտարարության նախագիծն էլ կընդունվի վաղը, իսկ Հայաստանը պետք է առավելագույն ու օպերատիվ ջանքեր գործադրի ՄԱԿ-ի և այլ ձևաչափերով Ադրբեջանի հանդեպ ճնշումները մեծացնելու ուղղությամբ»:
