Ճիշտ էլ անում եք, ծեծեք իրար

Հայոց քաղաքագիտության թշվառությունը և ծեծը անմիջական կապի մեջ են։

Այն, որ տգետ կառավարիչ ունեցող երկրում ամեն ինչ ապականվել է, ոչ մեկի համար այլևս նորություն չէ։ Համատարած գռեհկությունը, ցինիզմը, տգիտությունը դարձել են առօրյա։

Երեկ լրատվամիջոցները տարածեցին տեղեկություն, որ բանավեճի տաղավարում իբր թե կարծիքներ գեներացրած երկու քաղաքագետ Հանրային հեռուստատեսության բակում հարվածել են իրար։

Ընդ որում՝ ծեծկռտուքից հետո կողմերից առավել ագրեսիվը խրոխտ կեցվածքով ոստիկանություն է դիմել։

Նրանց մի կողմ թողնենք։

Քննարկենք դրանց «ռազբիրատ» հիշեցնող զրույցի որոշ հանգուցային բաղադրիչներ։ Նիկոլական քարոզի երիտասարդ կողմնակիցը հանրությանը հորդորում էր

1.միջանցք տրամադրել թուրքերին

2.համագործակցել թուրքերի հետ

3.հեռացնել ՀՀ-ին  բոլոր հնարավոր դաշնակիցներից

Մյուս՝ նվազ ագրեսիվ բանավիճողը հորդորում էր’

1.իսպառ կտրվել ՌԴ -ից

2.ՀՀ բերել ավելի շատ եվրոպական դիտորդների

3.հայտարարել մեր ինքնիշխանության մասին

4.գալ ինչ-որ անհասկանալի բալանսի

Փաստացի երկու կռվազան  «մտավորականները» կատաղի մարտնչում  էին Նիկոլի համար, նրա պրոթուրքական մոտեցման համար, մեր ուժերը, ներքին ռեսուրսները չօգտագործելու համար։

Երկու պրոնիկոլական քարոզիչները չէին կարողանում զրույցը նիկոլական թեզից թոթափել,  թեմայի կիրառական լուծումը գտնել։

Իսկ լուծումը մեկն է՝  երկիրը ռազմական ռելսերի վրա դնելը։

Այո՛, միայն ռազմականացված տնտեսությունն է մեր փրկության բանալին։ Դատելով երկու քարոզիչների ներկայացրած թեզերի վնասակարությունից՝ կարելի է ընդամենը մի բան մաղթել նրանց՝ ճիշտ էլ անում եք, ծեծեք իրար։

Նշենք, որ Սուրեն Սահակյանն ասել է, որ ծեծկռտուքի պատճառը հեռուստատեսության եթերում` բանավեճի ժամանակ, Արեգ Քոչինյանի կողմից իր հասցեին արված վիրավորական արտահայտություններն են եղել։

Գործն ուղարկվել է Քննչական կոմիտե

Հրայր Կամենդատյան