Գիշերը, դիմելով իր ժողովրդին, Պակիստանի վարչապետ Շահբազ Շարիֆը հայտարարել է, թե Պակիստանը աննախադեպ հաղթանակ է տարել, և որ պակիստանյան բանակը մեծ արհեստավարժությամբ կարողացել է աննախադեպ հարվածներ հասցնել Հնդկաստանին։
Սակայն արդյո՞ք այդպես է, և արդյո՞ք հնդկա-պակիստանյան հակամարտությունը կարող է ավարտվել այնպես, ինչպես պատկերացնում են Պակիստանում. Հնդկա-պակիստանյան՝ ռազմական գործողությունների վերաճած հակամարտությունը վերլուծել է քաղաքագետ Արա Պողոսյանը։
Նա նկատում է, որ հնդկական կողմում բոլորովին այլ հաշվարկներ են նշմարվում, և դրանք առավել երկարաժամկետ հեռանկարին են վերաբերում։
Այս փուլում եթե հնդկական կողմը ջրային ռեսուրսների կառավարման նախորդ` 1960 թ.-ի պայմանավորվածություններից հրաժարվի և ջրային հոսքերը` հատկապես Ինդոսի, սահմանափակի դեպի Պակիստան, ապա իսկապես չափազանց ծանր վիճակ կլինի Պակիստանի գյուղատնտեսության համար։
«Հեռանկարում նաև Պակիստանի մասնատման հարցն է լինելու ակտուալ, եթե Հնդկաստանում պահպանվեն այն ազգայնական տրամադրությունները, որոնք այսօր առկա են»,- կարծում է քաղաքագետը։
