«Ամենաանկեղծը հայերիս հետ միայն Ռուսաստանն է խոսում, բայց իր անկեղծությունը Հայաստանում արժանանում է դատապարտման, իսկ Արևմուտքի կեղծավորությունը` գովասանքի»,- գրել է «Լույս» տեղեկատվական-վերլուծական կենտրոնի ղեկավար Հայկ Այվազյանը։
44 օրյա պատերազմից հետ Ռուսաստանի նախագահ Վլադիմիր Պուտինը հայտարարեց, որ միջազգային իրավունքի տեսանկյունից Լեռնային Ղարաբաղը Ադրբեջանի մաս է։
Պուտինի այս հայտարարությունը տարբեր ձևերով նենգափոխվեց, խոսքից հանվեց «միջազգային իրավունքի տեսանկյունից» արտահայտությունը և ներկայացվեց, որ իբր Ռուսաստանն է ճանաչում Լեռնային Ղարաբաղը Ադրբեջանի մաս։
«Այնինչ Վլադիմիր Պուտինը անկեղծ ասեց հայերիս, որ աշխարհում չկա մի պետություն, ով կճանաչի Լեռնային Ղարաբաղի անկախությունը։ Ով էլ գա, խոսք տա` խաբում է։
Հետո խոսեց Սերգեյ Լավրովը` ներկայացնելով Դոնբասի ժողովրդի ինքնորոշման իրավունքը ՄԱԿ նորմերի համաձայն։ Այսօր տեսնում ենք, որ այդ իրավունքը իրացվում է ռուս զինվորի արյան գնով։
Այսինքն Ռուսաստանի անկեղծությունը հուշում է հետևյալը.
– Աշխարհում ոչ մի պետություն Լեռնային Ղարաբաղի անկախությունը չի ճանաչի:
– Լեռնային Ղարաբաղի հայության ինքնորոշման իրավունքը տեսականորեն կարող է իրացվել ՄԱԿ նորմերի համաձայն։
– Լեռնային Ղարաբաղի հայության ինքնորոշման իրավունքի իրացմանը հասնելու համար անհրաժեշտ է այն կարողանալ հիմնավորել, և նաև պետք է համաշխարհային ուժային կենտրոնի ցանկություն։ Արևմուտքին դա բացարձակ չի հետաքրքրում, Ռուսաստանին պետք է կարողանանք համոզել։ Իսկ դրա համար Ռուսաստանի նկատմամբ պետք է համապատասխան խիստ դրական վերաբերմունք ցուցաբերել։ Սկուտեղի վրա ոչ մեկն այդ ինքնորոշման իրավունքը մեզ չի տա»,- վերլուծել է Հայկ Այվազյանը։
