«Արմեն Գրիգորյան, որ էդպես վստահ տոնով ասում ես, թե «խաղաղության» պայմանագրում ֆիքսվում են «տեսանելի մեխանիզմներ Ղարաբաղի հայերի անվտանգության և իրավունքների համար», էդ մանդատը ձեզ ո՞վ է տվել․ Արցախի՞ ժողովուրդը, թե՞ ՀՀ ժողովուրդը․․․ ու՞մ եք դուք ներկայացնում»,- ՀՀ ԱԽ քարտուղար Արմեն Գրիգորյանին հռետորական հարց է ուղղել «Համախմբում» ընդդիմադիր շարժման ներկայացուցիչ Մենուա Սողոմոնյանը։
Ինչպես տեղեկացրել ենք, Արմեն Գրիգորյանն այսօր հայտարարել է, թե Հայկական կողմի համար ավելի կարևոր է միջազգային տեսանելի մեխանիզմի ստեղծումը, որի շրջանակում Ստեփանակերտն ու Բաքուն կքննարկեն անվտանգության և իրավունքի հարցերը։ Թե դա որ ֆորմատով կկատարվի, առաջնային չէ։ Առաջնայինն է այն, որ ստեղծվի մեխանիզմ։
Մենուա Սողոմոնյանին հետաքրքրում է, թե ո՞վ է Հայաստանի իշխանություններին, այդ թվում՝ Արմեն Գրիգորյանին արտոնել, իրավունք տվել խոսել Արցախի անունից։
«Արցախի Հանրապետության քաղաքացին քեզ տվե՞լ է մանդատ, որ որոշես իր ճակատագիրը։ ՀՀ քաղաքացին քեզ տվել է՞ մանդատ, որ բանակցես ու ստորագրես մի բան, որը պակաս է նրանից, ինչ ֆիքսված է ՀՀ Անկախության հռչակագրում, 1991-ի դեկտեմբերի 10-ի Արցախի անկախության հանրաքվեի արդյունքում ու ՀՀ Գերագույն Խորհրդի՝ 1992-ի հուլիսի 8-ի որոշման մեջ»,-հարցնում է ընդդիմադիր գործիչը։
