«Քաղաքացիական գիտակցություն» հկ նախագահ Նարեկ Սամսոնյանն իր ձերբակալումը համարում է քաղաքական հետապնդում, պատժատեսակ՝ իր նկատմամբ։
«Քանի որ Էդմոն Մարուքյանը հանդիսանում է Նիկոլ Փաշինյանի քաղաքական սիրուհին, սա իրականացվեց։ Դիմեցին ոստիկանույթուն, ոստիկանությունն էլ ակնհայտ կեղծ, ապօրինի ձևով ինձ բերման ենթարկեց։ Քննիչի մոտ ինձ ձերբակալելու որոշումն արդեն պատրաստ էր։ Քաղաքական կեղծ ընդդիմության կողմից սա կազմակերպված պատժիչ գործողություն էր, որի մասին ես դեռ կխոսեմ։
Ինձ պահել են՝ որպես կասկածյալ զուտ նրա համար, որ ձերբակալեն՝ առանց մեղադրանք առաջադրելու, որպեսզի քննիչը երկու կամ երեք օր ինձ պահի անազատության մեջ։ Բայց ի դժբախտություն իրենց՝ ես այնտեղից շատ առույգ եմ դուրս եկել, հանգստացել եմ, շնորհակալ եմ նրանց. ուժերս հավաքել եմ»,- ազատ արձակվելուց հետո ասել է Սամսոնյանը։
Նա սարկազմով ավելացարել է, որ մինչև հիմա զարմացած է եղել, թե թուրքական հատուկ ծառայություններն ինչու իրենով հետաքրքրված չեն եղել. հիմա արդեն հանգիստ է, որովհետև հասկացավ, որ ամեն ինչ ճիշտ է անում։
Հիշեցնենք, որ Նարեկ Սամսանյանի ձերբակալությունից հետո՝ դեկտեմբերի 14-ին, նրա փաստաբան Ռուբեն Մելիքյանը տեղեկացրել էր, որ քննիչը հայտնել է՝ «Լուսավոր Հայաստան» կուսակցության ներկայացուցչի դիմումի հիման վրա է Նարեկ Սամսոնյանը ձերբակալվել։
«Քրեական դատավարության օրենսգրքով կան ֆորմալ խոչընդոտներ, մենք կներկայացնենք այդ խոչընդոտները և կտեսնենք քննիչի գործողությունները։ Լայն առումով գործ ունենք մի երևույթի հետ, որի վտանգների մասին բազմիցս էինք խոսում, սա քաղաքական ընդդիմախոսների դեմ օգտագործման համար նախատեսված երևույթ է, որը մեծ թափով կիրառվում է»,-ասել է Մելիքյանը։
