Հայաստանի երկրորդ նախագահ Ռոբերտ Քոչարյանն ուղիղ եթերում տարեվերջյան ասուլիս է տալիս։ Ելույթի սկզբում նա անդրադարձել է երկրի անվտանգության խնդիրներին։
«Մենք անցնող տարում ունեցել ենք 36 զոհ, 30 վիրավոր և 30 նոր ռազմագերի։ Տարվա ընթացքում ոչինչ չի արվել բանակի մարտունակությունը բարձրացնելու համար։ 2-3 դիրքի համար մարտական գործողությունների ժամանակ ունենալ 30 գերի, խոսում է բանակի լրջագույն խնդիրների մասին։
Մեր երկիրը սարերից է կազմված. նույնն է, որ արաբներն ասեն՝ հո անապատի համար չենք պայքարելու։ Սա «էստի համեցեք» է։ Ադրբեջանցիներին ասում ես՝ չբնակեցված սարերի համար մենք չենք պայքարելու։
Եթե երկրի առաջին դեմքն այդպես է մտածում, սպան կամ զինվորն ինչո՞ւ պետք է այլ կերպ մտածեն, պայքարեն չբնակեցված սարերի համար»,- ասել է Ռոբերտ Քոչարյանը։
Նրա համոզմամբ՝ բանակի սպառազինության համար ոչինչ չի արվել։ Մինչև այսօր չի հրապարակվել պատերազմում զոհվածների իրական թիվը։
Սա պետության պարտավորությունն է, որ չի արվել։ Աննորմալ է, որ մեկ տարի անց այս հարցն անորոշ է։
Մեր բանկչության 70-80 տոկոսը լրջորեն մտահոգված է անվտանգության հարցերով։
Սրա համար պատասխանատվություն է կրում գործող իշխանությունը։ Բանակի բյուջեն այնպիսին չէ, որ մենք հույս փայփայենք, թե անվտանգության հարցը լուծվելու է։
«3 Պաշտպանության նախարար՝ մեկ տարում։ 2 գլխավոր շտաբի պետ՝ մեկ տարում, և 3-րդ պետին էլ փոխելու մասին է խոսք գնում. սպասում ենք «Հայկական ժամանակի» հրապարակումներին»,- նշեց Ռոբերտ Քոչարյանը։
Նախագահի համոզմամբ՝ այս իշխանությունը շահագրգռված չէ ունենալ մարտունակ բանակ։ Մարտունակ բանակի դեպքում ժողովուրդն իշխանություններին թույլ չէր տա գնալ մի շարք քայլերի։ Հայաստանը երբեք այսպիսի իրավիճակում չէր հայտնվել, ինչ վիճակում գտնվում է հիմա։
