Տարոսը ձեր քաղաքական թիմին՝ դրա ղեկավարի գլխավորությամբ

«Հետք»-ը ծավալուն հրապարակում է արել  քպ տնտեսական, ասֆալտի, ենթակառուցվածքների թեմաներով հանրային ճանաչում ձեռք բերած նախարար Գնել Սանոսյանի մոր գույքի, ավելի ճիշտ՝ նոր կառուցվող առանձնատան մասին։ Հետաքննող լրագրողները մանրամասն ներկայացրել են Գնել Սանոսյանի թոշակառու մոր կողմից տնօրինվող գույքի ձեռք բերման պատմությունը, շուկայական արժեքը, շինարարական թույլատվության գերարագ ձեւակերպումը և այլն։

Ըստ հրապարակման՝ առանձնատան կառուցման մանրամասն ներկայացված ծախսերը կազմում են 250 հազար դոլար։

Հատկանշական է, որ Գնելի, նրա կնոջ և փոխկապակցված անձանց եկամուտների հայտարարագրերի ու բանկային հաշիվների շարժերը վկայում են, որ նախարար քաղաքացի Սանոսյանը չունի նման միջոցներ և ոչ մի քոռ կոպեկով չի մասնակցել գործընթացին։ Չկան ձևակերպված փոխառություններ։ Օդում պտտվող կասկածներին ի պատասխան՝ մեր հարգելի նախարարը պատասխանել է, որ առանձնատան հողի սեփականության ձեռքբերման և կառուցման ֆինանսավորումը իրականացնում են իր եղբայրները, որոնք զբաղվում են արտագնա աշխատանքով։ Իհարկե, մենք հավատում ենք մեր աշխատասեր, ազնիվ նախարարին և խնդրում ենք կասկածողներին հրամցնել մի քանի փաստաթղթեր։

1.Եղբայրների կողմից դեպի Հայաստան կատարված փոխանցումների բանկային անդորրագրերը, որոնք անկասկած պետք է լինեն։ Եթե դրանք չկան, ապա առնվազն կարելի մտածել, որ փեշով փողերը ՀՀ են բերվել կանխիկ, բայց այդ դեպքում 10 հազար դոլարից ավելի գումարը պետք է մաքսային ձևակերպումներով առգրավվեր։ Մնում է մի տարբերակ՝  բարի կամեցող եղբայրները առնվազն 27 անգամ հատել են ՀՀ մաքսային սահմանը՝ գրպանում ունենալով 9999 ԱՄՆ դոլար։ Դա դժվար չէ ստուգել երկիր ժամանողների ցանկերում։

2. Նախարարի եղբայրների արտասահմանյան  եկամուտներից եկամտային հարկի վճարման անդորրագրերը, որոնք ըստ ՀՀ հարկային օրենսգրքի՝ պետք է վճարվեին բազայի նկատմամբ 11 տոկոս դրույքաչափով: Դա էլ դժվար չէ ստուգել ՊԵԿ բազաներում։

3. Ավելի քան 200 հազար  դոլարի կոնվերտացիայի անդորրագրերը, քանի որ 100 հազար դրամը գերազանցող գումարի կոնվերտացիայի համար փոխանակման կետերը իրականացնում են անձնագրային տվյալների գրանցում՝ համաձայն ՀՀ ԿԲ գործող փողերի լվացքի դեմ ուղղված օրենսդրության պահանջների։ Դա էլ դժվար չէ ստուգել ՀՀ ԿԲ մոնիտորինգային բազաներում։

4. Շինարարությունն իրականացնող կազմակերպությունների աշխատանքի դիմաց վճարումների բանկային փոխանցումների անդորրագրերը և պատվիրատուին տրամադրված հաշիվ ապրանքագրերը, քանի որ անկանխիկ գործառնությունների մասին ՀՀ օրենքով 300 հազար դրամից ավելի կանխիկ գործառնությունները արգելվում են։

Կարծում եմ՝  հարգելի նախարարի եղբայրները չէին կարող գտնվել արտագնա աշխատանքում և նույն ժամանակ սեփական ձեռքերով առանձնատուն կառուցել ՀՀ տարածքում։ Դա էլ դժվար չէ ՊԵԿ ստուգել tax service հարթակում։

5. Հետաքրքիր կլիներ, եթե պարզվեր, որ շինարարությունն իրականացնող բանվորներին վճարվել է կանխիկ կերպով,  կամ էլ նրանք գրանցված աշխատողներ չեն եղել:

Պահանջվող  փաստաթղթերի, անդորրագրերի ցանկը կարելի է շարունակել, բայց այսքանն էլ բավական է։

Որպես վերջաբան։

Բոլոր ազնիվ քաղաքացիները սպասում են վերոհիշյալ փաստաթղթերի հրապարակմանը։

Հրայր Կամենդատյան, տնտեսագետ, «Հայաքվե» նախաձեռնության ներկայացուցիչ