Հայաստան իմ մուտքի արգելքի վերաբերյալ պարզաբանումներ չեմ ստացել, թեև խոսակցություններ կան, որ արգելքը չեղարկվելու է։
Այս մասին լրագրողներին տված հարցազրույցում ասել է ՌԴ Պետդումայի պատգամավոր, ԱՊՀ գործերի, եվրասիական ինտեգրման և հայրենակիցների հետ հարաբերությունների հանձնաժողովի նախագահ Կոնստանտին Զատուլինը։
«Հայաստանի ղեկավարությունը հիմարություն արեց, ցույց տվեց, որ իր կուսակցական նախապատվություններն ավելի կարևոր են, քան դրսում Հայաստանին աջակցությունը։ Նրանք դա հասկացան ու հիմա փորձում են պաշտպանվել։ Նրանց ձեռնտու կլիներ, որ ես ինձ մեղավոր զգայի, և այդ հիմքով նրանք կհանեին արգելքը։ Ես ներողություն խնդրելու պատճառ չունեմ։ Ես երկար տարիներ աջակցել եմ ռուս-հայկական հարաբերություններին, քանի որ այդպիսին է Ռուսաստանի ազգային շահը։
Ես Հայաստանում ոչ մեկին պարտական չեմ, ես պարտական եմ միայն լավ բարեկամական հարաբերություններին, ես գնահատում եմ այդ հարաբերությունները և չեմ պատրաստվում խզել դրանք։ Եթե իշխանություններն իրենք են գնացել այս քայլին, ապա թող բարի լինեն, իրենք էլ չեղյալ համարեն։ Կփորձեմ ամենափոքր հնարավորության դեպքում այցելել Հայաստան և վերացնել բոլոր արգելքները, նորից հանդիպել մարդկանց հետ, ում անկեղծորեն վստահում եմ»,- ասել է Զատուլինը։
Պատգամավորը հիշեցրել է, որ նոյեմբերին չի կարողացել այցելել Հայաստան, քանի որ Հայաստանի իշխանությունները անցանկալի են հայտարարել իր ժամանումը։
«Ադրբեջանի իշխանություններն արգելել են իմ մուտքն Ադրբեջան մի քանի տարի առաջ՝ դեռ 2011 թվականին»,- եզրափակել է Զատուլինը։
