Ե՛ւ Պետություն, ե՛ւ Հայրենիք. հայտարարություն

Վերջերս ազգային հարցերի քննարկման հրապարակ ներմուծվեց մի խոսույթ, որի առնչությամբ մինչ այժմ ենթադրվում էր, թե ձեւավորվել է համատարած կամ գոնե մեծամասնության համախոհությունը։  

Խոսքը Հայաստան – Թուրքիա հարաբերությունների եւ այդ պարունակի մեջ՝ Պետություն, թէ՞ Հայրենիք թափ հավաքող բանավեճի մասին է:

Իրականության դատապարտում չստացած յուրաքանչյուր գիտակից հայի համար ավելի քան պարզ է, որ Թուրքիայի հետ հարաբերությունների պարագայում՝ Հայաստանը չի կարող իրեն թույլ տալ միամիտ մոտեցումներ եւ ռազմավարական ընկալումից անջատ ցնորամտություններ:

Ձեւավորովող աշխարհաքաղաքական իրողությունների եւ real politic-ի ներկա դարաշրջանում նման մոտեցումները եւ դիրքորոշումները կարող են սխալ ուղերձներ հղել շրջապատին՝ ե՛ւ դաշնակիցներին, ե՛ւ բարեկամներին, ե՛ւ հատկապե՛ս՝ թշնամիներին:

Հաճախորդ երկիրը ոչ ոքի վստահությանը եւ հարգանքին չի արժանանա՝ անկախ երբեմն իր նկատմամբ արտահայտվող հաճոյախոսություններից եւ զգացմունքային հռետորաբանությունից։  

Եթե գերիշխող դառնա նման մոտեցումը, հաստատապես, այլոց կողմից առաջնահերթությունը կտրվի իրենց անվտանգության եւ գերիշխանության համար  Հայաստանի որդեգրած նահանջամտության շահագործմանը, որպեսզի երրորդ կողմերը կարողանան սպասարկել սեփական շահերը:

Փաստ՝ որին օրնիբուն ականատես ենք արդեն:

Զուգահեռաբար՝ հետեւողականորեն ջանք ու եռանդ է գործադրվում, որպեսզի հրապարակ բերվի կեղծ ու ապակողմնորոշող մի խոսույթ՝ Պետությո՞ւն, թէ՞ Հայրենիք, Արարա՞տ, թէ՞ Արագած:

Փորձը ե՛ւ զազրելի է, ե՛ւ ամբողջությամբ դատապարտելի, որովհետեւ ակնհայտորեն հետին դիտավորությամբ՝ ձգտում են պետականության գաղափարը հակադրել Հայրենիքի գաղափարին:

Մինչդեռ՝ Հայրենիքի հավերժությունը ապահովվում է միայն հզոր, ինքնիշխան եւ ազգային իրատեսական գաղափարախոսությամբ առաջնորդվող պետականությամբ:

Իսկ պետականությունը ձեւախեղվում եւ այլանդակվում է, եթե իրենից անջատում են  Հայրենիքի գաղափարը եւ ազգային իղձերի նվիրագործման տեսլականը:

Հետեւաբար՝ այս երկու գաղափարները հակոտնյա չեն, իրար բացառող չեն, այլ՝ միմյանց ամբողջացնելով, միասնական գաղափարախոսություն կազմող անբաժանելի մասեր:

Ուստի՝

Ե՛Ւ ՀԱՅՐԵՆԻՔ, Ե՛Ւ ՊԵՏՈՒԹՅՈՒՆ:

Ե՛Ւ ԱՐԱՐԱՏ, Ե՛Ւ ԱՐԱԳԱԾ:

Ե՛Ւ ԱՐԱԳԱԾՈՎ ԴԵՊԻ ԱՐԱՐԱՏ:

ՀԱՅԿԱԿԱՆ ԺՈՂՈՎՐԴԱՅԻՆ ՇԱՐԺՈՒՄ

ԿԵԴՐՈՆԱԿԱՆ ԽՈՐՀՈՒՐԴ

(Վերակազմյալ)

16 մայիսի 2023