Դատական համակարգը գտնվում է քաղաքական վերահսկողության ներքո․ հակառակ դեպքում՝ դատարանը չէր կարող նման չհիմնավորված որոշում կայացնել. «Համախմբում» շարժման հայտարարությունը

Երևանի փոխքաղաքապետ Տիգրան Ավինյանի պահանջով Երևան քաղաքի առաջին ատյանի ընդհանուր իրավասության քաղաքացիական դատարանը մայիսի 2-ին 9 մլն դրամի չափով արգելանք է դրել լրագրող, «Երկու երես» հեռուստահաղորդաշարի հեղինակ Դավիթ Սարգսյանի աշխատավարձային հաշվեհամարի և գույքի վրա։ Արգելանքը դրվել է որպես ապահովում դատական այն հայցի, որով Տիգրան Ավինյանը պահանջել է լրագրող Դավիթ Սարգսյանից հերքել «Երկու երես» հաղորդաշարի «Տիգրան Ավինյան՝ նորահայտ մեծահարուստը» հաղորդման շրջանակներում հնչեցված փաստերն ու տրված գնահատականները։ 9 մլն դրամի չափով արգելանք է դրվել նաև «168․am» լրատվամիջոցի հաշվի վրա, որի յութուբյան ալիքով էլ հեռարձակվում է նշված հաղորդաշարը. լրագրողի գործունեության և խոսքի ազատության նկատմամբ պետական պաշտոնյայի կողմից աղմկահարույց դատական հայցի վերաբերյալ դիրքորոշում է հայտնել «Համախմբում» շարժումը։

Հայտարարության մեջ մասնավորպես նշված է.

Խստիվ դատապարտում ենք Դավիթ Սարգսյանի և «168․am» լրատվամիջոցի հանդեպ կիրառվող բռնաճնշման այս դեպքը, ինչը ազատ խոսքը լռեցնելու և ահաբեկման միջոցով գործող իշխանությունների մոտ ծաղկող կոռուպցիայի դրսևորումները պարտակելու նպատակ է հետապնդում։ Այս դեպքը նաև վկայությունն է այն բանի, որ դատական համակարգը գտնվում է քաղաքական վերահսկողության ներքո․ հակառակ դեպքում դատարանը չէր կարող նման չհիմնավորված որոշում կայացնել՝ նամանավանդ հաշվի առնելով այն հանգամանքը, որ «Տիգրան Ավինյան՝ նորահայտ մեծահարուստը» հաղորդման մեջ ներկայացված փաստերը վերցված են միայն բաց աղբյուրներից ու երբևէ հերքված չեն։

Մեր զորակցությունն ենք հայտնում Դավիթ Սարգսյանին և «168.am» լրատվամիջոցին։ Միաժամանակ զգուշացնում ենք, որ բոլոր ապօրինություններին ու չհիմնավորված որոշումներին հետևելու է օրենքով սահմանված պատասխանատվությունը։