«Կառավարությունը պարտավոր է հրապարակային բացատրել, թե ինչ է նշանակում այդ հայելային հետքաշումը։ սա բոլորիս անվտանգությանը վերաբերող հարց է․ Ոչ ոք իրավունք չունի թաքնվելու քաղաքական գործընթացների ներքո։ Ասե՞լ եք՝ հայելային հետքաշում. ես՝ ՀՀ ՄԻՊ Արման Թաթոյանս, կոնկրետ կակածի տակ եմ դնում այդ դիրքորոշումը։ Դե ուրեմն հրապարակեք»,- փետրվարի 23-ի ասուլիսի ընթացքում հայտարարել է ՀՀ ՄԻՊ Արման Թաթոյանը։
Նա զարմանում է, թե ինչու են Հայաստանի իշխանությունները «հայելային հետքաշում» կոնցեպտը գցել ադրբեջանցիների բերանը։ Նրանք էլ դա շահարկում են։
«Եկեք մեր քաղաքաացիների իրավունքների փաստերն օգտագործենք ու ամեն ինչի հիմքում դրանք դնենք, ոչ թե երկիրը վտանգող հայտարարություններ անենք։ Սյունիքն անվտանգ է… իրենց տարածքն է, ոչինչ չենք կարող անել… Դեռ մի բան էլ շատ պատասխանատու մի պաշտոնյա ասում է՝ մենք կարող ենք առանց սահմանագծման ու սահմանազատման էլ համարել, որ այդ հարցն արդեն լուծված է։ Ո՞վ է քեզ նման լիազորություն տվել։ Դա մեր քաղաքացիների իրավունքներն է վտանգում»,- վրդովմունքը չթաքցրեց Արման Թաթոյանը։
Նա պատմեց, որ նոր է վերադարձել Կապանից։ Այլընտրանքային ճանապարհները, նաև նոր կառուցվող ճանապարհները դիտարկվում են ադրբեջանցիների կողմից։ Այնինչ Հայաստանի կառավարությունն ասում է, որ դրանք անվտանգ ճանապարհներ են։
Երբ ասում են՝ զորքերի հայելային հետքաշում, նշանակում է և՛ սահմնապահների, և՛ ոստիկանական ուժերի, և՛ ԱԻՆ-ի հետքաշում։ Այսօր գյուղերը մեկուսացված են, ու մեր սահմանապահներն են բնակիչներին օգնություն ցույց տալիս։ Հայելային հետքաշման դեպքում ադրբեջանցիներն այդ տարածքներում բնակավայր չունեն, իսկ մենք ունենք։ Ի՞նչ է սա նշանակում, որ այդ գյուղերն՝ իրենց բնակիչներով պետք է անտեր մնա՞ն։
«Ադրբեջանը շարունակում է թշնամանքի ու ատելության քաղաքկանություն վարել, եթե դիվերսիոն գործողություն լինի, ո՞վ է պաշտպանելու այդ գյուղերը։ Էդ ո՞վ եղան էդ պաշտոնյաները, որ խաղան մեր ժողովրդի անվտանգության հետ»,- ասել է Արման Թաթոյանը։
