«Բռնապետության իրական դեմքը» վերնագրյալ ծավալուն հոդվածում օգոստոսի 26-ի «Ֆրանկֆուրտեր ռունդշաուն» ծանուցում է, թե դաշնային կառավարությանը վրդովեցրել է Բաքվի՝ եվրոպացի 76 քաղաքական գործչի մուտքի արտոնություն չտրամադրելը՝ Ադրբեջանում նոյեմբերի 11- 22-ը կայանալիք ՄԱԿ-ի կլիմայական COP29 գագաթնաժողովին ընդառաջ:
Պատճառն անշուշտ 2024-ի հունվարին ԵԽ-ի Ադրբեջանի դեմ կայացրած բանաձեւն է (որի համաձայն Ադրբեջանը առնվազն 1 տարով զրկվում է ձայնի իրավունքից), իսկ դրա գլխավոր շարժիչ ուժը Բունդեսթագի պատգամավոր, կրոնի եւ հավատի հարցերով դաշնային կառավարության հանձնակատար Ֆրանկ Շվաբեն է: Հոդվածագիր Էրքան Փեհլիվանը «Ֆրակֆուրտեր ռունդշաու» թերթում շարունակաբար արծարծում է Ադրբեջանի՝ մարդու իրավունքները ոտնահարելու, COP29 -ի անցկացումով «մեղքերը լվանալու» թեման, պարզաբանում նպատակը, ներկայացնում նաեւ հայկական համայնքային կառույցի՝ Գերմանահայոց կենտրոնական խորհրդի տեսակետը:
«Ադրբեջանը ցույց է տալիս բռնապետության իրական դեմքը. Ռեժիմին քննադատող արժանապատիվ պատգամավորներին արգելում են, իսկ պատրաստակամ պատգամավորներին պարգեւատրում են նվերներով», ասում է Շվաբեն՝ զգուշացնելով, որ երկիրը փորձում է ճնշում գործադրել: «Այս ծայրահեղ էսկալացիոն քայլով Ադրբեջանն իրեն դուրս է մղում եվրոպական պետությունների համայնքից: «Ադրբեջանին չի հաջողվի ճնշման ենթարկել ԵԽԽՎ-ին», համոզված պնդում է այդ կառույցում գերմանական պատվիրակության ղեկավար Շվաբեն:
Սոցիալ-դեմոկրատ (SPD) Շվաբեն ակնկալում է, որ Ադրբեջանի վերոհիշյալ քայլի դեմ արձագանք կլինի: «Ենթադրում եմ, որ Գերմանիան Եվրոխորհրդի եւ եվրոպական այլ պետությունների հետ դիվանագիտորեն կարձագանքի: Պատասխանը պետք է ոչ թե 76 առանձին պատգամավորներից սպասել, այլ՝ Եվրոխորհրդից, որ որպես ինստիտուտ հարվածի տակ է»:
ՄԱԿ-ի կլիմայական գագաթնաժողովը Ալիեւի համար բնապաշտ ներկայանալու, ընդհանրապես կեղտոտ գործարքները «պարզաջրելու» միջոց է դառնում: Գերմանահայոց կենտրոնական խորհրդի ատենապետ Յոնաթան Շփանգենբերգը «Ֆրանկֆուրտեր ռունդշաուի» թղթակցին փոխանցել է գերմանահայերի վրդովմունքը: «Արգելելով ԵՄ 26 երկրների 76 պատգամավորների մուտքը՝ Ադրբեջանը փորձում է COP 29-ը զերծ պահել քննադատական ձայներից, ինչպես իր երկրում է վարվում՝ լրագրողներին եւ իրավապաշտպաններին կալանավորելով», ասում է ԳԿԽ ատենապետը: Շփանգենբերգը հիշեցնում է, որ ՄԱԿ-ի գագաթնաժողովը Բաքվում անցկացնելու Ալիեւի նպատակներից մեկն էլ «ԼՂ-ի հայերի դեմ գործած ոճրագործության կոծկումն է»: «Ճիշտ ժամանակն է, որ ԳԴՀ կառավարությունը եւ Բունդեսթագը ջանք գործադրեն՝ Բաքվի բանտերից ազատելու հայ պատանդներին եւ ռազմագերիներին: Սա պիտի արվի մինչ գագաթնաժողովի մեկնարկը, եթե լինի, վստահելի քայլ կդառնա տարածաշրջանի խաղաղության համար», ձեւակերպում է Շփանգենբերգը:
Նույն թերթում Ֆլորիան Նաումաննը օգոստոսի 29-ին Ադրբեջանի մասին իր հոդվածը վերնագրել է «Անակնկալ Պուտինի հարեւան երկրում. Մի թեկնածու տակնուվրա է անում ընտրությունները»: Խոսքը սեպտեմբերի 1-ին նախատեսված խորհրդարանական ընտրություններն են, ու դրան Թարթարից մասնակից 31-ամյա անկուսակցական Շահրիյար Մաջիզադեն, որ ընտրվելու իր հաջողությունը կապում է սոցցանցերում ակտիվությամբ: Նա էլ, ինչպես բոլորը, (որ պատերազմ են վարում), խոսում է խաղաղության կարեւորությունից, ցավում է Ուկրաինայում շարունակվող պատերազմի համար եւ որեւէ բառից հասկանալի չի դառնում՝ ի՞նչ գույն ունի անկուսակցական այս թեկնածուն, որ ապրում է հայազուրկ Արցախում ու սոցցանցերով, ժողովրդի «լայքով» ուզում է մեջլիս մտնել: Նրա՞ վրա է դրված խաղադրույքը:
ԱՆԱՀԻՏ ՀՈՎՍԵՓՅԱՆ
Գերմանիա
Լուսանկարի մասին՝ Ֆրանկ Շվաբեի դեմ Բաքվի արշավը հետեւյալ ձեւակերպմամբ է՝ «Սա խնձոր է: Եթե համաձայն չեք, վճարվում եք Ադրբեջանից»: Սույնը հեղինակել է Գերմանաադրբեջանական խորհուրդը, X-ի հարթակում տեղադրել է Բեռլինում Ադրբեջանի դեսպան Աղաեւը:
