«Ազգ»ի նախորդ համարում իրազեկել ենք Բոննում հունիսի 3-13-ին ՄԱԿ-ի հովանու տակ անցկացվող Կլիմայի փոփոխություններին նվիրված համաժողովի մասին, (որ Բաքվում նոյեմբերի 11-24-ին գումարվելիք COP29-ի համաժողովի նախապատրաստական փուլն է), ինչպես նաեւ համաժողովի անցկացման վայրում հունիսի 3 եւ 7-ին Գերմանահայոց կենտրոնական խորհրդի կազմակերպած բողոքի ցույցի մասին: Թեեւ գերմանական եւ միջազգային մամուլը Բոննում գումարված հիշյալ համաժողովի առիթով առավելաբար նպատակահարմար համարեց ազդարարել պաղեստինցիների բողոքի մասին, սակայն սա ընկճվելու փոխարեն ստիպում է սփյուռքահայ կառույցներին ռազմավարություն նորոգել:
Աշխարհի տարբեր երկրներից Բոնն ժամանած պատվիրակները (6000 է մասնակիցների թիվը) տեսնում, լսում էին UN, stop greenwashing the genocidal and fossil energy azerbaijani dictatorship! «ՄԱԿ, դադարեցրո՛ւ մոլորեցնել, թե ցեղասպան և հանածո էներգիան կիրառող ադրբեջանական դիկտատուրան բնապաշտ է », «Ալիեւին՝ Հաագա», «Ռազմագերիներին անհապաղ վերադարձ» կոչերը, իսկ հունիսի 7-ին բողոքի արշավի մասնակիցներն առավել լավ էին պատրաստվել՝ նախ Բաքվում պահվող ռազմագերիների մեծ լուսանկարները, ՀՀ-ի, Արցախի մեծ դրոշների, մեծ պաստառների առկայությունն արդեն ուշադրություն էր գրավում, եւ նկատելի էր, որ ՄԱԿ-ի շենքից դուրս եկող մասնակիցներից շատերը շնորհակալ էին լինում, երբ հայ ցուցարարների ձեռամբ ստանում էին ռազմագերիների լուսանկարներով, նրանց ազատման պահանջով իրազեկման թերթիկներ: Շատերը կանգ էին առնում, երբ բարձրախոսով հստակ, մեկիկ- մեկիկ հնչեցվում էին հայ ռազմագերիների անունները, կոչ ուղղելով հանրությանը, որ անտարբեր չմնա, Ալիեւի վրա ճնշում գործադրելու միջոցով ստիպի ազատ արձակել հայ ռազմագերիներին՝ մինչ նոյեմբերին COP29-ի Բաքվում գումարումը:
Հունիսի 3-ին ադրբեջանցի ցուցարարները լքել էին հրապարակը, երբ հայերս այնտեղ էինք: Հունիսի 7-ին սակայն Բաքվից վտարանդի մի քանի լրագրողներ հրապարակում բարձրախոսն առած բողոքում էին, թե Կլիմայի հարցերով համաժողովը Ադրբեջանում կազմակերպելը հարստացնելու է միայն Ալիեւի ընտանիքին, ամրապնդելու է նրա ռեժիմը: Ադրբեջանցիների տաղավարը ցուցադրում էր Բաքվի բռնակալի՝ մի քանի տասնյակ հակառակորդների՝ բանտում կտտանքների ենթարկվող մարդու իրավունքների պաշտպանների, լրագրողների լուսանկարները: Երբ ադրբեջանցիներն ավարտեցին ելույթները, մոտեցա: Հարցրի՝ մարդու իրավունքների ոտնահարման մասին եք աղաղակում, ինչո՞ւ դրանց շարքում չեք նշում Լեռնային Ղարաբաղի հայերի իրավունքների մասին, Ալիեւի կաշառառության, ազատության դահիճ լինելու գնահատականին չեք հավելում նրա հայատյաց լինելու, էթնիկ զտման փաստերը: Ադրբեջանցի լրագրողը, որ ներկայացավ Աբիդ Գասիմով անվամբ, ասաց՝ ինչը չեմ հետաքննել, դրա մասին չեմ խոսում:
Նրա հետ զրույցի ուրվագիծը՝ առաջիկայում:
ԱՆԱՀԻՏ ՀՈՎՍԵՓՅԱՆԲոնն, Գերմանիա
