Իր նախորդ «Hour of the Witch» (Վհուկի ժամը) գրքի եւ «The Flight Attendant» (Ինքնաթիռի ուղեկցորդուհին) գրքի հիման վրա նկարահանված հեռուստասերիալի հաջողություններից հետո, «Նյու Յորք Թայմսի» կողմից «Լավագույն վաճառվող գրքի հեղինակ» ճանաչված Քրիս Բոհջալյանը թագավարակի պարտադրված մեկուսացումից հետո հանրությանն է ներկայացնելու իր «The Lioness» (Էգ առյուծը) խորագրով նոր գիրքը: Ուոթերթաունից Բարբարա Մերգերյանի հաղորդմամբ` Ամերիկայի հայկական թանգարանի դահլիճում մայիսի 18-ին նա քննարկելու է իր գիրքը երիցս Պուլիցերյան մրցանակի արժանացած վաստակաշատ հետազոտող-լրագրող, «Boston Globe» թերթի երկարամյա աշխատակից եւ «Master Thieves» (Վարպետ գողերը) գրքի (որին «Ազգ»ը ժամանակին անդրադարձել է) հեղինակ Սթիվն Քյուրքչյանի հետ:
«Պատմական առինքնող թրիլեր» բնութագրված նոր վեպն աֆրիկյան ճոխ սաֆարիի մասին է, որը դժբախտությամբ է ավարտվում: Դեպքերը կատարվում են Տանզանիայում, որտեղ երիտասարդ դերասանուհի Քեթի Բարստոուն եւ իր ամուսինը արկածախնդրություններով լի սաֆարի են կազմակերպում իրենց գործընկերների, մենեջերների եւ թերթի լրագրողների համար: Բնության գրկում մոմի լույսի տակ նախատեսված ռոմանտիկ խնջույքի պատրաստություններն ու կենդանական աշխարհի հետաքրքրական նկարահանումները հանկարծակի փոխվում են ու ողբերգական ավարտ ունենում երկրի հարեւանությամբ գտնվող արեւելյան Կոնգոյում կատարվող ապստամբության եւ օտարազգի վարձկանների վայրագությունների պատճառով:
Գիրքը հոգեբանական դրամա է գոյութենական պայքարի, սիրո եւ համբավավոր դառնալու մասին: Բոհջալյանը որոշ ժամանակ Տանզանիայում է անցկացրել` կարողանալու ճշմարտացիորեն նկարագրելու շրջակա միջավայրը: Նրա վեպերը սովորաբար արծարծում են մարդկանց եւ կենդանիների իրավունքների, ինչպես նաեւ բնապահպանական թեմաներ: Իսկ «Ավազե դղյակի աղջիկները» (2012), որ Հայոց ցեղասպանության մասին է, համարվում է նրա ամենահաջողված եւ ամենաանձնական ստեղծագործությունը: Այն պարտադիր ընթերցանության ցուցակում է ընդգրկված գրաքննադատների կողմից: Մասաչուսեթսում մայիսի 18-ի քննարկումը միակն է լինելու, որին անձամբ մասնակցելու է հեղինակը եւ ստորագրելու է իր գրքերը նախքան շրջագայության մեկնելը` ծանոթացնելու համար իր նոր վեպը տարբեր նահանգներում:
ՀԱԿՈԲ ԾՈՒԼԻԿՅԱՆ
The Armenian Mirror-Spectator
