Հայկական Արցախում հայաթափմանը զուգահեռ Ադրբեջանը ցինիկ ու քստմնելի հայտարարություններ է անում, թե «հայերին որեւէ մեկը չի վտարում իրենց տներից, նրանք կամովին են լքում Ադրբեջանի տարածքը»: Ծանոթներից մեկն օրեր առաջ տեսանյութ էր հրապարակել, որտեղ գաղթի ճանապարհի համար հաց ու գաթա էր պատրաստում: Դետալ առ դետալ իր բնակարանն էր նկարում, ցույց տալիս՝ պատշգամբում աճող պղպեղն ու լոլիկը: «Բերքն իհարկե, հետս կվերցնեմ՝ հուշերիս հետ միասին»,- ասում էր մանկավարժ կինը:
Տեսանյութի մեկնաբանությունների դաշտում ադրբեջանցի լրագրողներից մեկը գրառում էր արել՝ արցախցիներին հորդորելով մնալ ու ապրել իրենց հետ կողք կողքի: «Որեւէ մեկը ձեզ չի նեղացնի, մնացեք ու ապրեք Ադրբեջանի տարածքում»,- գրել էր լրագրողը:
Փոքր-ինչ ուումնասիրելով նրա Facebook-ի էջը՝ հետյալ գրությամբ հրապարակման հանդիպեցի. «Ադրբեջանի անկախության օրը՝ հոկտեմբերի 18-ին, մեր երկրի ամբողջ տարածքով մեկ կծածանվի Ադրբջեջանի դրոշը, խոսքը, առաջին հերթին, Ստեփանակերտի (խմբ.) մասին է»:
Հաշվի առնելով փաստը, որ Բաքուն առանձնահատուկ սեր ունի պետական նշանակության բոլոր տոները խորհրդապաշտական ծեսերի վերածելու, ապա ըստ երեւույթին՝ հոկտեմբերի 18-ին Ստեփանակերտում եւ Արցախի մնացած հատվածում ադրբեջանական դրոշ կծածանվի:
ՍԵՎԱԿ ՎԱՐԴՈՒՄՅԱՆ
