Որպես բարեգործ, հովանավոր, հանդիսատես եւ գործընկեր Արա Վարդուկյանը երկար տարիներ զորավիգ է եղել Սիդնեյի Սիմֆոնիկ նվագախմբին: «Միջազգային համբավի արժանացած դաշնակահարների մենահամերգների» մեր շարքը կազմակերպելը նրա բազմամյա համբերատար նվիրվածության արդյունքն էր:
Համերգների տեխնիկական պատրաստվածության գծով Ավստրալիայի առաջատար փորձագետներից մեկը լինելով՝ Արան հնարավոր ամեն ինչ անում էր կատարողական արվեստի ամենաբարձր մակարդակները նվաճելու համար, եւ նրա հոգատարությունը ինչպես անհատ երաժիշտների, այնպես էլ երաժշտական գործիքների հանդեպ մեծ ճանաչում էր ձեռք բերել ամբողջ աշխարհում: Դաշնամուր լարելու հմուտ մասնագետը երկար ժամանակ էր անցկացնում Սիդնեյ ժամանող յուրաքանչյուր արվեստագետի հետ, ներկայացնելով նրանց իր մասնագիտական բազմամյա փորձառությունը կատարողական համապատասխան ոլորտներում, որպեսզի վստահ լիներ, որ նրանց երաժշտական գործիքները կապահովեն ակնկալվող ձայնային գերազանց մակարդակը:
Մանրամասնությունների մեջ խորամուխ լինելը աներեւակայելիորեն բնութագրական էր նրան, եւ մեր հանդիսատեսը մեկ անգամ չէր, որ դրա ականատեսն էր եղել, հատկապես նվագախմբի «Steinway Concert Grand Piano» դաշնամուրի վերանորոգումից հետո:
Երաժշտության բոլոր ոլորտներում անձնուրաց նվիրյալը, իր տիկնոջ՝ Նաիրիի հետ, 1985-ին հիմնեց «Թեմա եւ վարիացիներ» խորագրով դաշնամուրային դասընթացների ծառայությունը: Նրանք նաեւ առատաձեռն բարեգործներ հանդիսացան Ավստրալիայի արվեստասեր հասարակության շրջանում: 2011-ին նրանք հիմնեցին նույնանուն մի հիմնադրամ, որպեսզի ֆինանսական օժանդակություն եւ մասնագիտական ուղղվածություն կարողանան տրամադրել ավստրալիացի լավագույն երիտասարդ դաշնակահարներին: Նրանց «Ծաղկող Արվեստագետներ» համերգային շարքը անթիվ-անհամար կատարողներին առիթ տվեց մենահամերգներով հանդես գալ արվեստասեր հանրության առաջ:
Որպես արվեստի ջատագով եւ հմուտ մասնագետ Արան 2016-ին պարգեւատրվել է «Ավստրալիայի Օրդենի» պետական բարձրագույն շքանշանով:
Մեր խորին ցավակցությունները Նաիրիին, Հայկին, Դրոյին եւ նրանց ընտանիքներին:
