Նյու Ինգլենդի լրագրության եւ մամուլի ասոցիացիան (ԼՄԱ) հայտարարել է, որ այսուհետ չորս ականավոր լրագրողներ, այդ թվում «Բոստոն Գլոբի» Սթիվ Քյուրքչյանը իրենց պատվավոր տեղն են զբաղեցնելու «Փառքի սրահում»` ի նշան երախտագիտության վեց նահանգներ ընդգրկող տարածաշրջանում գործող եւ արտակարգ պրոֆեսիոնիալիզմի հասած լրագրողների:
Արարողությունը տեղի է ունենալու մարտի 28-ին Պորտլենդի (Մեն նահանգ) «Ռիջընսի» հյուրանոցում, որտեղ ԼՄԱ-ն գումարելու է իր տարեկան համագումարը:
Ասոցիացիայի հրապարակած զեկույցում նշվում է. «Երեք անգամ Պուլիցեր մրցանակի արժանացած Քյուրքչյանը մեծ ներդրում է ունեցել հետաքննող լրագրության ասպարեզում, հատկապես «Բոստոն Գլոբի» «Spotlight» թիմի համագործակցությամբ: Նա օգնել է բացահայտելու կոռուպցիոն գործողությունները Սոմերվիլ քաղաքապետարանում եւ քաղաքական թաքուն գործարքները MBTA-ում, որոնց համար արժանացել է իր առաջին պուլիցերյան մրցանակներին: Հետագայում կաթոլիկ եկեղեցու ներսում հոգեւորականների սկանդալի վերաբերյալ նյութերը ամրապնդել են նրա համբավը: Նրա առաջնորդությամբ բացահայտվել են նաեւ «Իզաբել Ստյուարտ Գարդներ» թանգարանից արվեստի գործերի գողության մանրամասները: Թոշակի անցնելուց հետո նա այդ մասին գիրք է հրատարակել եւ որպես խորհրդատու մասնակցել այդ թեմայով «Netflix» սերիալների նկարահանումներին: Նա ոչ միայն լեգենդար լրագրող է, այլեւ սիրված եւ հարգված մենտոր եւ ընկեր, որ դաստիարակել է հարյուրավոր լրագրողների եւ խմբագիրների»:
Սթիվ Քյուրքչյանից բացի «Պատվո սրահի» մյուս երեք լրագրողներն են «Cape Cod Times»-ի Պոլ Պրոնովոստը, «Հանրային հնչեղության Մեն կենտրոնի» Նաոմի Շալիտը եւ Ջոն Քրիստին:
Պատրաստեց` ՀԱԿՈԲ ԾՈՒԼԻԿՅԱՆԸ
The Armenian Mirror-Spectator
