Թուրքիան շարունակում է սպառազինություն մատակարարել Ուկրաինային, եւ նրա աջակցության ծավալներն աստիճանաբար աճում են: Դա խոսում է այն մասին, որ Անկարան շահագրգռված է ռուս-ուկրաինական հակամարտության ծավալման հարցում: «Ուռա. ռու» ռուսական լրատվական գործակալության վկայությամբ, նման կարծիք է հայտնել Թուրքիայում ՌԴ արտակարգ եւ լիազոր դեսպան Ալեքսեյ Երխովը:
«Մատակարարումները շարունակվում են: Դրանց անվանացանկը ավելացման միտում ունի»,- դեսպանի խոսքն է մեջբերում ՌԻԱ-նովոստի-ն: Ի հետեւություն, Երխովը ենթադրում է, որ չնայած ՌԴ-ի հետ բարեկամական հարաբերություններին, Թուրքիան միեւնույն ժամանակ աջակցություն է ցուցաբերում Ուկրաինային՝ դրանով երեւան հանելով իր իրական շահագրգռությունը հակամարտության հետ կապված, այն է՝ դրա շարունակումը:
Մինչ ԱՄՆ-ն ու Եվրոպայի երկրները ուկրաինային պաշտպանելով՝ պատժամիջոցներ են կիրառում Ռուսաստանի նկատմամբ, Թուրքիայի նախագահը փորձում է հանդես գալ իբրեւ նրա եւ Ուկրաինայի միջեւ խաղաղության միջնորդ: Չգիտենք՝ Ռուսաստանում տեսնո՞ւմ են ինչպիսի «միջնորդ» է նա: Սակայն այդ պատերազմում մի կողմին նրա զենք մատակարարելու հետ կապված՝ երեւի չպետք է զարմանալ, եթե հիշենք ժամանակին հայ Արցախի դեմ պատերազմի պատրաստվող մեր ռազմատենչ հակառակորդին ռուսական զենքի ու սպառազինության ակտիվ մատակարարման հարցին ՌԴ նախկին մի փոխվարչապետի սառն պատասխանը՝ դա բիզնես է:
Մեր բարեկամ Ռուսաստանն, իհարկե, վերջին շրջանում շատ բան Թուրքիային ներում է: Այնպես որ պարոն դեսպանն էլ գուցե այդտեղ մի քիչ զգույշ մնա…
Գ. Մ.
