Պետությունը որոշել է խոշորացույցի տակ առնել պաշտոնյաների ստացած նվերները: «Պետական գույքի կառավարման մասին» օրենքի փոփոխությունները՝ իրավապահ համակրագին լիազորություններ կտա պարզել, հարկ եղած դեպքում նաեւ պարզաբանումներ ստանալ հանրային ծառայողների եւ պաշտոնյաների ստացած նվերների մասին: Ազգային ժողովում նախագիծը ներկայացնող արդարադատության փոխնախարար Կարեն Կարապետյանի ներկայացրածով՝ պետական սեփականություն դարձող նվերները տնօրինելու է Պետական գույքի կառավարման կոմիտեն, իսկ ՀՀ նախագահի, վարչապետի, ԱԺ նախագահի, փոխվարչապետերի, նախարարների եւ այլ բարձրաստիճան պաշտոնատար անձանց ստացած արարողակարգային նվերների տնօրինման վերաբերյալ եզրակացություն է տալու Պետական արարողակարգային ծառայությունը, որը ռեեստրում հաշվառելու է այդ նվերները:
Ըստ նախագծի հարակից զեկուցող, ՔՊ-ական պատգամավոր Ալխաս Ղազարյանի, դատավորները կարող են ընդունել եւ իրենցը համարել միայն այն նվերները, որ ստացել են պետական կամ պաշտոնական այցերի, աշխատանքային այցերի կամ գործուղումների ժամանակ: Հյուրասիրությունը, կրթաթոշակը, դրամաշնորհը կամ նպաստը եւս նվեր է, եթե այն տրվել է մրցույթի արդյունքով մյուս դիմորդների նկատմամբ հավասար պայմաններում ու նույն չափանիշներով: Միջազգային կազմակերպությունների, օտարերկրյա պետությունների կողմից տրամադրվող դրամաշնորհը, որպես պետական պարգեւ տրամադրվող գույքի վրա եւս պետությունը աչք չի դնի:
Ազգային ժողովի պետական-իրավական հարցերի մշտական հանձնաժողովի նախագահ Վլադիմիր Վարդանյանին հետաքրքրում է՝ եթե ընդդմադիր պատգամավոր Գեղամ Նազարյանին ճաշի հրավիրի, հաշիվն էլ ինքը վճարի, դա ընդունելի՞, թե՞ կոռուպցիոն ռիսկեր պարունակող նվեր է: «Եթե 160 հազար դրամը գերազանցում է, ընդունելի չէ»,- արձագանքում է Ղազարյանը:
ՍԵՎԱԿ ՎԱՐԴՈՒՄՅԱՆ
