Օրերս «Ազգ»ի գրադարանը հեղինակների ձեռամբ ստացավ թերթի երկարամյա աշխատակիցներից Մանվել Միկոյանի եւ Թամար Հովհաննիսյանի հետեւյալ գրքերը.
Մանվել Միկոյան. «Լռության խոնավ աչքերը»
Բանաստեղծությունների այս ժողովածուն լույս է տեսել «Էդիթ Պրինտ» հրատարակչատանը, 2021 թ.ին, եւ հանդիսանում է հեղինակի քերթվածների 7-րդ ժողովածուն: Հեղինակի ժողովածուներից առաջինը լույս է տեսել 1991 թ.ին՝ «Շարունակվող մղձավանջ» վերնագրով, որին հաջորդել են «Անդրադարձներ», «Որտե՞ղ են երաժիշտները», «Անդունդի եզրով քայլողը», «Հիշողության միջանցքներում» (ռուսերեն) եւ «Ստվերներից անդին» գրքերը:
Մանվել Միկոյանը միաժամանակ զբաղվում է լրագրությամբ: Վանաձորում, որտեղ ապրում եւ ստեղծագործում է, խմբագրել է տարբեր թերթեր, «Ազգ»ին սկսել է աշխատակցել 1991 թ.ից: Ներկայիս գլխավոր խմբագիրն է «Լոռու մարզ» պաշտոնաթերթի:
Նրա ստեղծագործություններն արժանացել են բազմաթիվ մրցանակների, թարգմանվել տարբեր լեզուներով: 2018-ին նրա «Ստվերներից անդին» ժողովածուն արժանացել է ԹՄՄիության մրցանակի:
Ներկա գրքի շապիկին որդու՝ Արմեն Միկոյանի ստեղծագործությունն է՝ «Հորս դիմանկարը» վերնագրով:
Թամար Հովհաննիսյան. «Դուք՝ մտքերիս աշխարհում»
«Վան Արյան» հրատարակչատանը 2020 թ.ին լույս տեսած հատորն ամփոփում է մասնագիտությամբ դաշնակահար-երաժշտագետ հեղինակի տարբեր տարիներին հրատարակած հոդվածները Հայաստանի եւ Սփյուռքի պարբերականներում, որոնց թվում՝ «Ազգ»ում, որի մշակութային էջի պատասխանատուն է եղել տեւական ժամանակ, ինչպես նաեւ Երեւանի Հ. Ղափլանյանի անվան թատրոնի երաժշտական խորհրդատուն:
Թամար Հովհաննիսյանը հեղինակ է 15 գրքի:
Ներկա հատորը, որը բացվում է հանգուցյալ Լեւոն Անանյանի «Երկու խոսքով», ամփոփում է հեղինակի երաժշտական, գրական ու թատերական թեմաներով գրած շուրջ 30 հոդվածներն ու ուսումնասիրությունները, եւ մեկ անգամ եւս ընդգծում հեղինակի պրոֆեսիոնալ հմտությունները, քննադատություններում ու գնահատանքներում նրա արդարամտությունը, հրապարակագրի կիրքն ու սրտացավ վերաբերմունքը մեր կյանքի տարբեր երեւույթների նկատմամբ, ի մասնավորի մշակութային ասպարեզում:
