Լոյս է տեսել «Ազգ»ի երկարամեայ հեղինակ, բանասիրական գիտութիւնների թեկնածու, ՀՀ ԳԱԱ Պատմութեան ինստիտուտի հայկական գաղթօջախների եւ սփիւռքի բաժնի աւագ գիտաշխատող Արծուի Բախչինեանի «Հայերն Աֆրիկայում. Պատմաբանասիրական ուսումնասիրութիւն» հատորը (Երեւան, ՀՀ ԳԱԱ Պատմութեան ինստիտուտ, 2024): Խմբագիրն է պատմական գիտութիւնների դոկտոր, պրոֆեսոր Գեւորգ Ստեփանեանը:
Ուսումնասիրութեան մէջ ի մի են բերուած պատմական եւ մշակութային ցաք ու ցրիւ փաստեր, որ վերաբերում են հայերի ներկայութեանն աֆրիկեան ցամաքամասի երկրներում 25 երկրներում՝ հնագոյն ժամանակներից մինչեւ մեր օրերը: Աշխատութիւնը չի ներառում Եգիպտոսի եւ Եթովպիայի հայութեան պատմութիւնը, քանի որ դրանք վաղուց ի վեր գրուած եւ ուսումնասիրուած են: Ամենից ընդարձակը Սուդանի հայ համայնքի պատմութեանը վերաբերող գլուխն է: Բացի բուն բովանդակութիւնից՝ հատորն ունի մէկ յաւելուած («Հայ-աֆրիկեան շփումներ այլ երկներում»), ամփոփումներ երեք լեզուով (անգլերէն, ֆրանսերէն եւ աֆրիկեան լինգալա լեզուով), օգտագործուած գրականութեան, անձնանունների եւ տեղանունների ցանկեր:
Հատորը դասական ուղղագրութեամբ է, շապիկին լուսանկարին սուդանաբնակ Մկրտիչ Ուլիկեանն է՝ սեւամորթ մի ցեղի հետ (նրա վերաբերեալ Արծուի Բախչինեանի յօդուածը լոյս է տեսել «Ազգում», 2020, սեպտեմբերի 4):
Մինչ այս պատմաբանասէր Արծուի Բախչինեանը հեղինակել է աշխատութիւններ (առանձին հատորներով եւ յօդուածներով) հետեւեալ երկրների եւ տարածաշրջանների հայօջախների մասին՝ Սկանդինավեան պետութիւններ, նախկին Հարաւլաւիայի երկրներ, Ալբանիա, Չեխոսլովակիա, Սիբիր, Չինաստան, Ճապոնիա, Ովկիանոսք (Օվկիանիա):
