Հուլիսի 7-ին բիթլ Ռինգո Սթարի ծննդյան 83-րդ տարեդարձն էր: Ինչպես նախորդ տարիներին՝ այս անգամ էլ դիմագրքում Ռինգո Սթարի պաշտոնական էջը տարածեց Երեւանի Բիթլզ փաբում հավաքված հայ երկրպագուների երաժշտական շնորհավորանքը. այժմ նրանք կատարում էին Ռինգոյի «Octopus s Garden» երգը: Բիթլը տեսահոլովակը այսպես է մակագրել՝ «Խաղաղություն եւ սեր Երեւանից, Հայաստան» եւ կողքին տեղադրել հայկական դրոշի մանրապատկերը: Այնուհետեւ այս նյութը տարածվել է «Բիթլզի» դիմագրքային պաշտոնական էջում: Ըստ բազում մեկնաբանությունների՝ այս տարի էլ հայ երկրպագուների շնորհավորանքն ամենահաջողվածն է (շնորհավորանքներ էին ստացվել նաեւ Մեծ Բրիտանիայից, ԱՄՆ-ից, Իտալիայից, Իսպանիայից, Արգենտինայից, Ուրուգվայից, Պերուից, Ռուսաստանից, Ճապոնիայից եւ այլ երկրներից):
Ռինգոն (իսկական անունը՝ Ռիչարդ Սթարքի) լիվերփուլյան քառյակի ավագագույն անդամն էր, սակայն վերջինն էր հայտնվել դրա կազմում: Նա ոչ միայն խմբի թմբկահարն էր եւ որոշ դեպքերում՝ երգիչը, այլեւ կարեւորագույն դեր ուներ խմբում հակասությունները հարթեցնելու գործում: Նա երբեմն դառնում էր Ջոն Լենոնի կծու կատակների «զոհը». այսպես, Լենոնը մի առիթով հայտարարել է, թե Ռինգոն ոչ միայն աշխարհում, այլ նույնիսկ «Բիթլզ»-ում լավագույն թմբկահարը չէ: Իսկ երբ Ռինգոն բողոքել է, որ Ջոնը եւ Յոկոն մերկ լուսանկարվել են իրենց համատեղ ալբոմի կազմի համար ու քառյակը ստիպված պետք է պատասխան տա նրանց արարքի համար, Ջոնը պատասխանել է. «Ռինգո, դու պիտի պատասխանես միայն հեռախոսազանգերին»:
Ինչեւէ, նույնիսկ Լենոնն է ի վերջո ընդունել, որ «Ռինգոն ֆանտաստիկորեն լավ թմբկահար է», իսկ Փոլ Մաքքարթնին նշել է, որ Ռինգոյին նախընտրում է աշխարհի բոլոր թմբկահարներից: Հինգերորդ բիթլ Ջորջ Մարթինի խոսքերով՝ «նրա հնչողությունը ոչ ոքի հետ չես համեմատի, նա չափազանց հնարամիտ է եւ ժայռի պես կուռ, ու ամենակարեւորը՝ ցնցող կերպով զգում է երգը»: Ինքը՝ Ռինգոն իր մասին ասել է. «Ես սովորական թմբկահար եմ. իմ գործն է՝ այնպես նվագել, որպեսզի երգչին հարմար լինի երգել»:
Դեռ երիտասարդ տարիներից Ռինգոն շփումներ է ունեցել սփյուռքահայերի եւ ծագումով հայերի հետ: Բիթլզի կազմում նա նվագում էր «Զիլջյան» ապրանքանիշի ծնծղաների վրա, ինչը դրանց վաճառքի կտրուկ աճի պատճառը դարձավ: 1968 թ. Սթարը եւ Շառլ Ազնավուրը նկարահանվել են «Քաղցրակերը» փսիխոդելիկ ֆիլմում:
2011 թվականին «Rolling Stone» ամսագրի ընթերցողները Ռինգոյին անվանել են «բոլոր ժամանակների հինգերորդ լավագույն թմբկահար»: Նա երկու անգամ ընդունվել է Ռոքնռոլի փառքի սրահ՝ որպես բիթլ եւ որպես մենակատար: 2020 թվականին նա ճանաչվել է աշխարհի ամենահարուստ թմբկահարը՝ 350 միլիոն դոլար կարողությամբ: Նրա՝ առայժմ վերջին «EP3» սինգլը թողարկվել է 2022 թվականին:
ԱՇՈՏ ԳՐԻԳՈՐՅԱՆ
